陳君宜無飯人妻升呢大廚
名媛陳君宜對烹飪向來一竅不通，但近年因為小朋友加上投資餐廳，火速升呢成為美女廚神，中、西、泰菜都難不倒她，又為餐廳構思新菜式及為兒子設計每日餐單，動手兼動腦，難怪忙到未有時間生第二胎！
經營食肆年多的名媛陳君宜（Qinnie）把生意做得有聲有色，Qinnie表示因為開餐廳及有了小孩的關係，她更由無飯人妻搖身變成大廚：「我本身係唔識煮嘢食，但依家有個動力，有咗小朋友會想留喺屋企食，健康啲。我依家煮乜嘢食都OK，連泰菜我都識煮，咖喱炒蟹、鮑魚都識煮，之前做咗個擔擔麵，老公話好好食，可以喺餐廳度賣，其實餐廳好多食物我都有份構思。」
Qinnie除了親自下廚外，還親身到街市買餸，又會為兒子設計一日四餐的餐單，務求天天新款。由於Qinnie的餐廳以卡通造型食物做噱頭，所以除了味道，她亦十分重視食物外觀，她說：「我發現啲食物個樣得意啲，人都食得開心啲，同埋會食多啲，我平時整嘢食畀囝囝都會花好多心思，整得好靚，又會買啲卡通牙籤裝飾食物。」
計劃生B追囡
另外，Qinnie的餐廳最近以Miffy作為食物造型，大受歡迎，對於生意愈做愈好，她透露一直構思再開分店，可惜未找到合適位置：「我哋喺香港區同九龍區都有分店，依家想新界都開一間，但搵唔到好位，我哋唔想求其搵個位去開，預計都要投資六、七百萬開新舖，但暫時唔會再搵新合夥人。」工作如此忙碌，生育大計豈非要延遲？她坦言一直有計劃生第二胎：「係有計劃，但我個仔令我太忙，我只係煮嘢畀佢食都花好多時間，我唔想冇咗教佢嘅時間，工人唔會幫你教到仔，要自己身教，好似我同老公就算減肥，但喺佢面前食飯都要扮食嘢，咁囝囝先會食，試過幾次畀佢聽到我哋話減肥唔食，囝囝又話唔食。（你想追個女﹖）梗係想，不過我隨緣，最緊要健康。」
文：名人組