Gin Lee「地道港人」恨買樓
歌手Gin Lee順利過渡將取得三粒星成為港人，要活在香港當下，她承認並不容易，很欣賞港人在壓迫環境中那份堅毅奮鬥去求存的精神。曾經歷過窮困擔驚受怕日子的她，不求大富大貴，能自給自足已心滿意足。
來自馬來西亞的歌手Gin Lee（李幸倪）在港居住快滿七年，可以名正言順當個香港人，她坦言內心早已當自己一半是港人，甚至朋友說：「你唔講人哋都唔知你唔係香港人，因為你成個香港人咁樣。」阿Gin笑言雖然不會說粗口，但講話、反應都好地道港人，她坦言在香港生活是好大挑戰：「係唔容易，做嘢好辛苦，好長時間，競爭又大，最困難係大部分港人都冇足夠空間同精神空間去平衡緊張嘅生活，相對馬來西亞生活悠閒啲，競爭冇咁大，即使收入唔多，你都會有好大嘅屋，不過我覺得香港人好叻，喺咁壓迫嘅環境同狀態下，依然可以生存得好好。」
擇偶「比我有錢最好」
阿Gin曾經歷零收入，擔心冇錢交租的黑暗日子，她坦白說：「幾乎係會發癲。」最後靠自己由谷底爬番上來，如今總算在經濟方面穩定下來，不用再為交租而頭痛，她說：「我唔係要大富大貴，過得舒服有地方住，想食嘅食到，想去旅行就去，能自給自足已好好。」她更希望將來能在香港置業，她笑說：「梗係想，邊個唔想喺香港買樓，但要再努力。」單身多年的她直認會有寂寞時候，她笑說：「講話冇係呃人。」談到擇偶條件，她笑說：「比我有錢最好。（使唔使有樓有車？）有地方住好緊要，就算佢依家冇唔代表將來都冇，睇佢係咪好上進嘅人。」
為專輯靈修冥想
獲唱片公司力捧的她稍後會推出新專輯，為配合活在當下的主題，今次碟內所有歌曲全部都是她與五個樂手一Take過錄音，她說：「每首歌喺10 Take內一定收貨，通常第7、8 Take都係最好嘅，每日最多錄兩首歌，但快過平時錄音。」現場錄音好考唱功？她笑說：「有信心囉。」只不過現場錄音最麻煩及嘥時間是前期的準備，缺一不可，她的狀態也要保持最佳：「要好小心唔可以病。」為籌備專輯，過去一年她睇了很多靈修的書，做了很多冥想，尤其他們從事娛樂事業，要切實做到活在當下取得平衡是好難。
髮型：Eva Chiu@Fifth salon
化妝：Circle Cheung@ND&Co.
場地：Chic by The Oyster House
文：音樂組
攝：張福宏