邵美琪佬味十足同原島爭女

邵美琪（左）與湯怡飾演母女。

邵美琪（Maggie）、湯怡和原島大地前日在西環海旁拍攝英皇新戲《日月星》，英皇老闆楊受成驚喜現身，答謝Maggie特意抽空客串，並為導演劉偉恒和另外兩位演員打氣，更請大家吃下午茶鬆一鬆，幫他們叉足電。客串三日的Maggie飾演一位勁Man的女的哥，巧合下撞破女兒湯怡和揸住靚車的原島大地打算拍拖睇星，Maggie抑壓怒火、保持笑容「下令」湯怡落車跟她回家，更在湯怡上的士之際怒睥原島大地！但一停機Maggie即變回Nice爆前輩，友善地與原島大地聊天。

不嬲男仔頭

對於勁型兼「佬味濃」的打扮，Maggie說：「我真係當自己係個佬咁做(口架)！覺得自己唔夠Man。（好少咁佬？）之前拍杜琪峯執導嘅戲做警察試過，嗰時當自己係仔，會型啲！（細個男仔頭？）因為冇兄弟姊妹，屋企人同時當我係仔、又係女。」並指與新演員合作既開心又緊張。

邵美琪（右）下令湯怡落車，無視原島大地。	楊受成（右二）前來探班兼請食下午茶，為演員打氣。	邵美琪豪邁地上的士。

戲中瞞着家人拍拖的湯怡，自爆讀書時有類似經歷：「一次拍咗三個月，另一次拍咗三日，拖過一次手同出過一次街，媽媽唔知(口架)！」單身的原島大地則直言將來想和女友去浪漫地觀星：「但未遇到呢個人，想像唔到對方鍾唔鍾意咁，依家都係專心學業先！」

文：影視組