棉花棒撩出事！ 蘇永康險篤穿耳膜：成枕頭係血

蘇永康前晚與陳柏宇（Jason）、側田攜手舉行音樂會，音樂會由嘉賓黃浩琳及黎曉陽打頭陣，其後三位主角登場合唱《男人KTV》，再輪流獨唱。阿公在台上不時搞爛gag，他獻唱日文歌時，側田表示想一起唱，阿公聞言笑說：「知你搶咪！下次我唱韓文。」當側田唱《B.O.K》時請觀眾打拍子，阿公又笑言：「如果個個識數，我哋仲有得撈？」引來觀眾爆笑。

得番七成聽力

騷後阿公自爆左耳受傷：「撩耳嗰陣發覺得番支棒，舊棉花喺裏面，仲覺得有少少痛。」他用眉鉗取出棉花，發覺左耳大約得七成聽力，很擔心失聰：「第一件事睇醫生，因為不斷流血，幾驚傷到耳膜，聽嘢矇矇哋。我靠左邊瞓，一醒成個枕頭都係血，如果掉番轉，啲血凝固就好麻煩。醫生話耳膜冇事，不過真係『隊』到好入，我仲見到塊肉揭起咗，佢幫我撳番塊肉落嚟，再搽抗生素。」他坦言被耳傷影響，令演唱會表現失準：「冇得賴，點會幾廿歲人犯咁嘅錯誤？我呢行如果耳仔有問題就等如破產同失聲，好危險，好彩爭少少先到耳膜。」他透露9月將帶家人到新加坡開騷，順道讓兒子在度假屋游水。

陳柏宇易緊張

而Jason就指阿公與側田都是其偶像，跟兩人唱歌是夢寐以求的事，又自言很易緊張，笑指12月的紅館騷要用幾首歌熱身。他直言即使有老婆到場支持亦冇幫助，皆因對方已變成觀眾的一部分：「我同側田研究過，我哋一上到台緊張嘅時候會高音咗。原來高手都係咁，令我安心咗少少。」

文：音樂組