現年20歲的美國嫩模Bella Hadid憑魔鬼身材與獨有風格成為人氣王，社交網Instagram有多達1,440萬粉絲，而她不但外表比名模家姐Gigi冷酷，近日更自爆小時候已一心想獨立以報答父母，最終18歲已不靠父幹「維生」，現更坐擁約9,388萬港元身家，堅係自給自足！
Bella於2014年跟隨家姐Gigi腳步入行，雖未如對方以金髮及甜美笑容化身夢幻女神殺出血路，但憑高挑身材及Cool爆外表，一樣行出彩虹！短短3年已為多個國際品牌行騷及代言的她，去年以超性感高衩Deep V火紅晚裝踏上康城電影節紅地氈，頓成全球焦點，聲勢一時無兩！
談及令她成名的招牌「黑面」，Bella近日大聲呼冤，自言性格與表情不符：「啲人成日話我喺社交網望落刻薄又嚇人，但我其實好愛同人接觸，呢個正正就係基本嘅『天生臭臉』，而且有時我喺鏡頭前笑，感覺好唔舒服，講真，幾乎到今年，我先真正了解自己塊面！」
Bella並非單靠「面口」搵食，首次打工便落手落腳在加州一間果汁店，整果汁、收銀與洗杯碟一腳踢，相當落力！她自爆小時候眼見父母白手興家，即立志早日獨立，搵銀照顧自己：「我唯一可以報答佢哋，就係好似佢哋咁勤力。我從來唔鍾意用父母錢，所以一到17歲就決定展開個人事業，希望18歲前財政獨立，而我前年真係做到！」
立心不靠名模媽媽Yolanda及富豪爸爸Mohamed Hadid的她，成功堅苦幹，過去兩個月僅放了3日假，她在訪問中說：「我尋日朝早為品牌開工，下午影雜誌封面，之後直落品牌活動，再上機去另一城市受訪，整日只有40分鐘空檔，真係好攰！」她近兩個月便有至少５個雜誌封面出爐，搏到咁盡，難怪年紀輕輕已坐擁約9,388萬身家，認真勵志！
雖然遺傳了媽咪的Fit爆身材及靚樣，但Bella並非自小就立心入行，早於3歲已接觸馬術的她，反而曾有一個奧運夢！Bella前年受訪時自爆一直接受馬術訓練，已達專業水平，曾打算參加2016年倫敦奧運會，可惜去年因長期受萊姆病（Lyme Disease）困擾而被迫放棄夢想。不過，她未忘這個兒時志願，近日在訪問中說：「如果我唔係模特兒，可能就係攝影師或者馬術選手！」她更形容事業上最痛苦的決定，是因病放棄馬術及賣出愛駒。現時她全情投入模特兒工作，更揚言不排除踩入大銀幕，相信事業上仍大有發展！
萊姆病是由蜱蟲所咬引致的傳染病，患者初期大多出現大型環狀皮疹，有機會引發神經、心臟及關節病變，若細菌上腦，嚴重更會引致慢性腦炎甚至死亡。
文：外娛組