重遊中大心跳憶初戀黃文意追求者投湖示愛

藝人黃文意（Mandy）自小在沙田長大，當中帶給她最難忘回憶的是母校香港中文大學，皆因她的初戀在此萌芽。Mandy今次踏足母校，重遊昔日拍拖之地，大談初戀的心跳回憶，並重溫當年讀書的點滴。

黃文意拍攝無綫節目《3日2夜》後，其36D驕人身材成為話題，並躋身無綫新一代咪神行列。不過，Mandy點止得外表？畢業於香港中文大學的她，原來曾修讀文化研究系，成績不俗，可謂美貌與智慧並重。

Mandy這天重返母校，帶大家走遍中大的特色角落，第一站先到有拍拖勝地之稱的未圓湖，其初戀亦於此發生，她說：「未圓湖夜晚會開晒燈，感覺好浪漫。以前成日都嚟拍拖，同初戀男友第一次約會同初吻都喺呢度發生，未圓湖對我嚟講係一個充滿回憶嘅地方。」提起初戀男友，Mandy大方分享結識經過：「我哋唔係讀同一個系，偏偏報埋一樣嘅Course，嗰時先認識佢，咁啱我又識佢嘅堂細佬，兩個人開始熟，最後仲一齊添！」一拍就拍足三年拖，惟二人畢業後各散東西，分手收場，但Mandy憶起初戀，亦不禁甜笑稱是一段美好的回憶。

守秘多年：掟咗盒雞翼落湖

未圓湖環境優美又清幽，吸引不少情侶前往約會，但Mandy曾在約會期間發生不愉快的小插曲：「有一次約咗男友嚟未圓湖野餐，但我掛住整瑞士雞翼遲大到，當時男友等咗好耐，仲要企喺度暴曬兼餵蚊，所以佢面色唔太好，結果嗌交收場，期間唔知係我定佢仲發脾氣扔咗盒雞翼落水。我收埋呢個秘密喺心好耐，因為驚畀人知我哋破壞公物，但當然係做得唔啱，都想講番聲對唔住，大家唔好亂學呢啲不良行為！」

靚女自然多人追！Mandy曾遇瘋狂追求者跳湖示愛，令她相當「頭痕」！她說：「嗰時有個追咗我好耐嘅男仔，想我做佢女友，咁啱我哋都係未拍過拖，所以佢為咗同我一齊兼『出Pool』（指成功脫單），於是跳落未圓湖示愛，但事後我拒絕咗佢，始終唔鍾意對方，無謂拖拖拉拉。同埋我覺得佢呢個舉動幾傻，因為未圓湖啲湖水好污糟，跳落去實會皮膚敏感。」

樣貌標致的黃文意（左一），畢業時與同學齊齊切乳豬。

黃文意力撐母校飯堂並非都是「頹飯」質素。

爬崇基石變空中飛人

Mandy對豎立在校園門前的民主女神像和崇基石亦充滿回憶，不少旅客亦慕名到像前「打卡」，當中崇基石更是畢業相必影位：「當時我都有喺崇基石影畢業相，仲爬到最高去影，點知落去時差錯腳，好似空中飛人咁喺空中打咗個觔斗再落地，好彩跌喺軟綿綿嘅草地上，冇咩受傷。」惟這次險事卻令她留下陰影，笑言對崇基石望而生畏。

至於大學生涯少不免「走堂」、「開夜車」趕功課，自言是壞學生的Mandy統統做過，但每次返早會都必定準時，她說：「因為返早會要計出席率，返唔夠次數係冇得畢業，就算幾早都好，大家都一定會準時出席早會。加上開早會嘅時間好長，但可以坐嘅位置唔多，所以要早到去霸位。」