霹靂火燒足四分一世紀！靚靚走辣同成龍「找數」

少年得志兩捧影后

袁詠儀係聰明女嚟，如果唔係當年都唔會選完港姐，拍咗幾套劇，就被人發掘咗去拍戲，仲要一拍就攞最佳新演員，再連續兩年攞影后，好演員要有好嘅觀察力，試問靚靚又點會唔識睇人眉頭眼額？

但正所謂「少年得志大不幸」，靚靚23歲女已經連捧兩屆影后，係「影后s」有「s」，眾數嚟o架！未攞過嘅係唔會明白嗰種「獎獎在手，天下我有」嘅傲視同群感覺，但可以學靚靚「表哥」黃子華喺《娛樂圈血肉史2》咁代入呢種心理：好多人問我拍戲攰唔攰？推戲仲攰啦！由今日開始，我唔會再角逐影后，因為冇挑戰性，我會角逐影帝！

人就係咁，發展太順利，一唔為意就會意氣風發，氣燄大咗自己都唔知，靚靚都係人，攞完第二座影后嘅佢，即刻成為成龍電影嘅女主角，畀着任何一個都會飄飄然，加上靚靚本身直腸直肚，又貴為影壇新寵，分身乏術，喺無心嘅情況下失場而令成龍唔開心，如果唔係成龍去年喺內地節目怒斥有演員耍大牌：「看你幾時完」，有人推斷係講緊袁詠儀，係真唔係呀？所以靚靚自己都要解開呢個廿年不和之結！

醒目識搵志偉搭路

冰雪聰明嘅靚靚其實睇緊幾時緣分到！好唔容易終於等到日前成龍、曾志偉搞飯局，於是自告奮勇問志偉可唔可以預埋佢，主動搵機會同成龍化解心結！做錯嘢肯承擔，喺今日嘅香港實在難能可貴，靚靚唔考慮玩賴皮，而選擇勇敢面對，除咗係受到好好先生張智霖（Chilam）感化，適度減辣外，身為人母嘅佢，亦藉此向囝囝「魔童」示範做人處世嘅寶貴一課，可謂一石幾鳥！

眾所周知，靚靚除咗生勾勾嘅咯咯雞之外，可以話冇有怕！就算同靚仔Chilam拍拖、結婚、生仔，都一直御夫有道妻管嚴，Chilam忠心之餘，就連傳過緋聞的女星許秋怡、佘詩曼等亦對靚靚生敬畏之心，你就知佢管理手腕幾厲害！

至於靚靚識搵志偉做中間人，證明佢聰明，有留意圈中大小事，事關早年某女諧星以氣燄狂噴多位記者，結果之後嘅連串採訪活動，班記者都唔騷擾佢老佛爺雅興，直到呢位女星知衰，叫導演老公請志偉出面說情至得到解決，所以你話靚靚揀老公叻，揀和事老又叻，佢唔拍戲，係咪應該去做Casting呢！

Nuts哥