與準顧問醫生青梅竹馬 朱千雪低調護愛苗：結婚通知你！
娛樂圈又多一位女神封盤，藝人朱千雪前晚承認早前與準顧問醫生男友Justin蜜遊新加坡兼見家長，不過千雪BB揚言有責任要保護對方，故不願多談，實行低調護愛苗。
朱千雪早前被指與圈外男友Justin同遊新加坡，前晚她現身活動時大方承認，並表示兩人相處中，感覺很開心，又自爆母親與胞妹也有同行，她說：「趁有假期去旅行，我哋識咗好耐，大家嘅屋企人都好熟。（兩家人係世交？）我媽咪同佢媽咪熟過我同佢。」她稱與男友自小認識，相識了29年，可算青梅竹馬，問兩人是否已指腹為婚？她笑：「唔係，咩年代呀！（佢媽咪當你係新抱？）係世姪女。（你媽咪好鍾意佢？）我唔知，我冇問佢。」
「大家相處得舒服」
千雪坦言兩人雖然相識多年，但最近才開始聯絡，關係比較親近，又不禁大讚對方：「佢都幾好，依家大家相處吓先，我唔急。我唔想講得太詳細，唔係怕公司鬧，因為佢係圈外人，我有責任令佢唔好被打擾。（點解最近會撻着？）大家相處得舒服，發展得好自然。（咁仲要觀察幾耐？）觀察到夠為止，需要多啲時間，大家又唔喺同一個地方，唔想諗咁遠，只係要諗下次幾時見、去邊度食飯。」
盼給予相處空間
問到千雪BB是否已封盤？她說：「唔識答，我知道係咩意思但唔識點答。（你要畀啲訊息其他追求者？）我冇其他追求者，所以唔使畀，總之結婚通知你，順其自然。」她又澄清Justin是修讀Interventional Radiology（介入放射學），已經不是學生，好快成為顧問醫生，而且在外國工作，希望大家給予二人相處空間。
文：名人組