黃建東遭父母迫遷慳家買磚頭

藝人黃建東（Derek）憑惡搞日本洗腦歌《PPAP》成功上位後工作量大增：「多咗電影、登台機會，仲擔任網劇《降魔的番外篇》其中一個單元男主角，壓力好大，因為個角色唔要騎呢，係一個好有智慧嘅人。」

Derek表示現階段最想演繹智力或身體有障礙的角色：「搭港鐵試過有兩個人講嘢好大聲，啲人投以奇怪眼光，原來佢哋智力上有啲障礙，但佢哋好真誠！我想演繹佢哋嗰份真心，希望社會更了解同關懷佢哋。」

至於收入是否增加很多，Derek笑言：「唔敢話收入多，我要儲錢買樓。」為了「上車」，Derek指日常生活慳得就慳：「唔捨得買車代步，黐車坐，又成日坐巴士，亦好少買衫。」更指父母亦想他盡快搬走，無奈樓價高企，惟有繼續努力，他又坦言遇過「物質女」：「會問我住邊，揸咩車，咁我知咩事，會打退堂鼓。」

不過Derek亦認同「有樓」是成家立室的必要元素：「就算個女仔肯跟我，都唔想佢捱！」問緋聞女友兼前DJ瑪姬是否不着重物質？他即甜笑謂：「據聞佢係小富婆，唔知有幾多層樓在手。（追佢？）我哋都幾夾到，我交心朋友唔多。」不過Derek坦言現階段想努力工作，經濟穩定才想感情事。　

髮型：Deep Yu@Beijing Hair Culture

化妝：Alfred@Seven sense

服飾：HARRISON WONG、Solovair HK、ARTE MADRID

場地：Eno Space Station

文：專案組

攝：李柏儒