舒淇忍氣吞聲瞓地畀面馮德倫
由馮德倫（Stephen）執導，舒淇、曾志偉和法國影星尚連奴（Jean Reno）主演的電影《俠盜聯盟》，講述幾名俠盜玩轉歐洲，靈感來自幾年前發生的康城電影節盜竊案，有大量動作及飛車場面，但最令人難忘的，相信是Stephen與舒淇在拍攝期間結成夫妻！
兩人近日接受訪問宣傳新片，問到今次合作跟以往有否不同？舒淇笑言從沒試過咁乖，因怕兩人意見不合會令人誤會：「我唔可以投訴，免得人哋以為我哋鬧交。佢叫我做咩，基本上我都做，有場戲我要瞓地扮死，如果其他導演我就唔瞓喇！畀多咗佢（Stephen）喇！呢啲算係優待佢，今次係從來都冇咁乖嘅一次。」問到舒淇拍攝時有否特權？Stephen笑說：「佢要求攝影師拍到佢好似18歲一樣！」
嫌棄老公演技
問兩人之後會否再夫妻檔合作？舒淇擰晒頭，Stephen則說：「睇劇本同時間啦！」若一齊做演員又如何？舒淇搞笑說：「我啲戲咁好，費事佢拖累我，工作理念唔同會有磨擦，始終男女睇嘢角度唔同。」舒淇表示近年開始減產，一年拍一部戲，問是否有老公養？她說：「不嬲自己養自己！（計劃生BB？）唔關事，係（皮膚）敏感問題唔穩定。」
Stephen最難忘是一場康城追車戲：「當時係電影節剛剛完，仲有好多人，要大批警察幫手封路，我哋都安排咗一百個工作人員企唔同嘅位，唔畀途人行出嚟，要逐段路逐段路咁拍。」
文：影視組
攝：張福宏
場地：The Landmark Mandarin Oriental,Hong Kong
舒淇髮型：Sev Tsang 化妝：Elvi Yang
馮德倫髮型：Carr Cheng 化妝：Hetty Kwong