岳華加國現身消瘦撐拐杖

岳華自前年拍畢無綫劇《張保仔》後便鮮有露面，今年4月更一度被指「失聯」，近日終於露面，在溫哥華出席舞台劇記者會，同場還有雷安娜和周秀蘭等。穿上藍色無綫風褸的他戴着cap帽，身形明顯瘦了許多，面龐瘦削，膚色黝黑，並需用拐杖，精神雖看來不俗，但由於消瘦很多，健康情況令人憂心！

自然療法控制糖尿

據知岳華近年患有糖尿病，因擔心藥物有副作用，故沒有食藥治療，而以自然療法控制病情。居於加拿大的他獲太太恬妮悉心照顧，雖鮮有公開露面，但他不時會與好友飯敍。記者昨致電岳華，但截稿前未能聯絡上。

與岳華相識卅載的馬海倫，今年4月曾在微博公開尋找岳華，昨日她受訪時揚言早前已跟對方取得聯絡。問到岳華是否患病？她揚言不知道：「佢啲朋友都有見過佢，佢好好冇事，舊年我都同李琳琳去台灣見岳華夫婦，去四日見足四日，當時佢（岳華）精神非常好，仲話會返無綫拍劇。」李琳琳則指近期沒跟岳華聯絡，去年岳華返港時大家有聚會，當時見他很健康：「佢太太恬妮之前返港推廣自然療法，好多朋友都幫手做義工，之後佢返加拿大各有各忙都冇聯絡。（佢好似有糖尿病！）我哋溫哥華大家有個圈子，有時見到佢啲相，都好好，冇事。」

獲讚幫助新人

曾跟岳華兩度合作劇集《名門暗戰》及《張保仔》的陳凱琳，則向岳華送祝福：「我第一套劇就係《名門暗戰》，岳華做我爹哋，佢好Nice、好幫助我呢啲新人，做戲又叻。拍完劇都有Keep住聯絡，有問候過佢，知佢返咗加拿大。因為大家都係加拿大人，特別投契同有話題，如果佢身體抱恙，祝福佢盡快康復。」另一曾跟岳華合作的姚子羚亦祝對方早日康復。岳華現跟無綫還有藝員合約，去年獲邀拍劇集《天命》，但因他要去台灣探望女兒，故沒接拍，如將來有劇合適，無綫都會邀岳華拍攝，對方亦沒有請假。

文：影視組