捧曼聯場望七萬球迷見證 蕭正楠叫翠如求婚：我唔想等！
蕭正楠日前與女友黃翠如到英國旅行，被指為結婚「睇景」的他，昨日宣傳劇集時再次否認婚訊，但大爆翠如性格主動，笑言要等女友求婚，自言恨結婚的他更公開叫翠如求婚：「我都唔想等咁耐！」
無綫熱播劇集《超時空男臣》一班演員蕭正楠（Edwin）、曹永廉（阿廉）、何廣沛、田蕊妮及王君馨等昨午於將軍澳一間酒店出席宣傳活動，與粉絲大玩遊戲及食飯，齊齊率先觀看明晚播出的一集。而無綫助理總經理（戲劇製作）曾勵珍亦有現身，大讚眾演員演技出色。
Edwin剛與女友黃翠如從英國旅行回港，有傳此行是籌備婚禮，他笑說：「我都唔知乜嘢叫睇景，拍戲就要睇景啫！我拍咗三套劇，好耐冇休息，咁啱佢都去探細妹，只不過係好普通嘅旅行，唔好將結婚、度蜜月掛鈎。」又透露女友與他一同入場欣賞英超愛隊曼聯的比賽，問到翠如是否想在球場等求婚？他笑說：「我都等佢喺七萬幾人前求婚，等到入球都未等到，大家互相等。」
「想畀佢一個家」
不過Edwin指此行更加了解翠如：「佢好錫佢細妹，又知慳識儉，漢堡包貴都唔捨得食，佢係好女仔，娶得過。」他表示稍後要到外地拍攝節目，翠如又要宣傳新劇，故很珍惜這次旅行。至於有否結婚打算，Edwin說：「我都想畀佢一個家，畀啲時間我諗諗。」身旁的阿廉笑指他可能早已求婚，但被翠如拒絕。Edwin笑說：「唔係！今次純粹旅行，我都等佢求婚，佢性格好怪，要畀佢做主動。希望快啲，我都唔想等咁耐。」他表示父母未有催婚，現在畀心機工作。
曹永廉欠債 邵美琪打救
而何廣沛日前被指因忙拍劇而與前組合Donut成員周梓盈分手，他指感情方面一向低調，不會將公私事混為一談：「唔知邊度傳出嚟，唔係事實唔回應，得啖笑。（工作忙犧牲拍拖？）唔覺得，公司咁多靚女，眼睛都賺晒。」
此外，阿廉早前擔任梁泰來的電台節目嘉賓，重提當年由歌手轉做無綫藝人：「當時嘅經理人同我講人工好奀，得幾千蚊，我隔住電話喊，以前打工嘅收入最少都有一萬幾千。」又自揭做歌手前因收入少而欠巨債：「出道嗰兩年冇人工只靠積蓄，用完就開始碌卡，最高峰時欠十幾萬卡數，好在邵美琪搵我登台先還清卡數。」
文：影視組