追Queen秘笈！
識揀！近年無綫不少小生不約而同向選美出身的美女埋手，憑過人追女攻略抱得美人歸！
馬國明天然呆夠貼地
天然呆筍盤馬國明出名夠宅夠孝順，雖自封悶蛋，只識睇波同帶阿媽飲茶，但卻被2012年港姐亞軍黃心穎睇成優點，並坦言：「悶有悶嘅好」，兩人「拍拖」節目永遠都是睇戲同睇戲，認真夠平民又夠Sweet！
鄭嘉穎細心糖果攻勢
鄭嘉穎與2013年港姐冠軍陳凱琳年齡雖相距22年，但薑愈老愈辣，憑細心和觀察入微，在荷蘭拍攝劇集《殭》期間，嘉穎知道陳凱琳愛吃糖，趁未埋位往買咖啡，發現有地道糖果售賣，即買下所有味道給陳凱琳選擇，又大師兄上身用心教做戲，最終奪芳心！
陳豪浪漫咖啡王子
和2006年港姐冠軍陳茵媺拍攝劇集《心戰》而撻着的陳豪，懂得享受生活飲咖啡，靠沖咖啡打動對方，並經常製造浪漫驚喜，如送花及親自下廚等，拍拖不久便發展至同居，陳豪並非玩玩吓，當正同居預演結婚，預演Family Man，陳茵媺終在2013年嫁給對方，更被陳豪封為「My Queen」。
王祖藍條脷識轉彎
高度不是問題，口技超卓已贏在起跑線！王祖藍靠把口將高自己至少五吋的2005年華姐冠軍李亞男抱返屋企，成功在於初時以教做戲、口才及中文入手，又親自填詞《跌落凡間的天使》冧女，有共同宗教信仰已加晒分，拍拖時拒同居並打造「Love+Purity」貞操戒，令女方覺得備受尊重！
