陳寶珠 梅雪詩永遠懷念林家聲
粵劇名伶梅雪詩（阿嗲）、陳寶珠及楊天經等昨日出席已故名伶林家聲紀念會，寶珠透露心裏一向尊重林家聲，讚對方是一位很好的前輩：「呢份心意會喺心入面，記得有一年同天經佢哋去聲哥屋企，之後仲帶佢出去食飯，印象好深刻。（之後有冇其他紀念活動？）咁就唔知。」
天經表示從小喜歡林家聲：「記得跟住媽咪去睇聲哥做大戲，我成日入後台搵Uncle，嗰時有張後台證好矜貴，我嘅工作就係拖住聲哥出入後台，好似我依家拖媽咪咁，真係好榮幸。」阿嗲亦指林家聲於其心目中地位崇高：「記得當年演《紅樓夢》時，聲哥對我好好，有指點我，所以好鍾意佢，佢會不厭其煩教導後輩。我好尊重亦好難忘記佢，時間過得太快，但我仍然會懷念佢。」
