揞名爆舊情遭梁泰來踢爆 邵仲衡被撬牆腳寸「劉青雲」幼稚

現年53歲的邵仲衡多年前被傳跟劉青雲爭郭藹明致不和，但當時他矢口否認和郭藹明拍過拖！日前邵仲衡接受電台節目主持梁泰來訪問，重提這段陳年「撬牆腳」事件！他揞名爆指拍《大時代》時，被劇中跟他角色對立的男演員撬牆腳，力追當時女友劉美娟：「當時電視台安排我哋到馬來西亞登台、工作，大家原本相安無事有講有笑。但突然有一日，佢態度完全轉變，講嘢又衰衰咁，又攞吓你便宜。」他感到古怪才向女友「呻」，不料女友爆料：「原來佢成日喺我女朋友樓下等，係想追我女友。」他強調沒有震怒，但最令他不屑是：「只係覺得呢啲（感情）事唔好帶返片場，好幼稚。」又指跟對方並非傾得埋的朋友，故少交談為妙。

「人哋有權追你女友」

昨日邵仲衡接受本報記者電話訪問，問他是否指劉青雲撬牆腳？他多番強調：「我唔會講邊個，都係咁多年前嘅事，況且大家都各有家庭。（但梁泰來喺電台新聞稿寫咗劉青雲個名！）唔會講。」問到該小生當年可知劉美娟是他女友？他仍口硬說：「唔好講啦，人哋係有權追你女朋友，係視乎個女仔揀邊個。」問他是否覺得該小生行為幼稚？邵仲衡竟說：「我冇講過。」而梁泰來受訪時稱：「問番邵仲衡啦。（但你寫咗係劉青雲！）咁我哋私底下有傾過。」

劉青雲與邵仲衡合作神劇《大時代》。

劉美娟指邵仲衡沒有指名道姓，不會對號入座。

拍拖無數 不枉此生

邵仲衡除了公開和劉美娟有段10年情外，又提及入行後第一個公開的女友邱淑貞（豆斗）。他直言豆斗當年參選港姐時，游說他參加同年無綫主辦的「超級新星」，可惜入行公開戀情不久就分手。他又自誇拍拖無數，劉美娟、邱淑貞等只是冰山一角：「多到好似走馬燈咁，依家回頭睇先發現，嘩！真係不枉此生呀。」

而劉美娟接受訪問時表示：「印象中邵仲衡唔係已經講過咩？係舊聞，唔會再回應。（覺得對方又重提緋聞？）唔關我事，我係局外人。（覺得困擾？）唔會，佢又冇指名道姓，係大家嘅猜測嚟啫！」至於劉青雲至截稿前仍未回覆。

文：音樂組