溫拿成員陳友榮升爺爺，成為樂隊首位抱孫的成員，他前晚為孫兒Tyler舉行百日宴，圈中好友如譚詠麟、鍾鎮濤、彭健新、李治廷及陳曼娜等紛紛到賀。
榮升阿爺的陳友昨日接受電話訪問時自覺好威水：「我抱孫，即係溫拿已經去到第三代喇，我又係第一個抱孫，真係好威！我每日做完嘢都會第一時間返屋企，好想同佢玩嘛，以前邊有咁深閨吖？」而陳友的兒子陳良韋曾參選港男，對於榮升人父感到高興，又感激圈中前輩出席晚宴。
溫拿成員彭健新對於陳友抱孫亦相當開心，昨日接受電話訪問時說：「知道佢抱孫，佢搞咗百日宴，我、阿倫（譚詠麟）同阿B（鍾鎮濤）都有去。」又透露封了利是給B仔：「利利是是！（大利是？）隨意啦，利是只係見面禮，有好多跟尾，之後會食飯一路慶祝。」至於陳曼娜上載了不少派對照片，記者笑問她是否曾與溫拿成員拍拖而老友鬼鬼？她大笑否認，表示與溫拿識於微時，曾是麗的電視花旦的她當年在電視台遇上溫拿，於是拍下「世紀合照」，又說：「我封咗大利是畀對方（陳友）。我月底都做婆婆喇，會有個外孫女，好開心可以同佢扮靚！」