英國「粗眉模」Cara Delevingne近年轉戰影壇，戲接戲人氣爆燈，靠做Model起家的她自爆以執導演筒為目標，不過Cara大呻最難拍喊戲，因不懂在人前流淚，要喊，就要先打殘自己變弱者！此外，Cara大方剖白雙性戀傾向，令好友困惑，她笑指老友「Out」爆！
Cara近年從天橋踩過界行到影壇，憑超強人氣而片約不斷，由愛情片玩到超英片，近期更擔正科幻大片，雖然講明愛拍戲多過行騷，但Cara未有忘本：「我從來冇諗過可以做到演員，所以我好開心我做過Model，如果最初冇做模，一定唔會有機會做到小時候就想做嘅演出或音樂工作！」
樣靚身材正的Cara早前於超英片中演索爆女巫，賣樣雖然冇難度，但講到在電影《星際特工：千星之城》（Valerian and the City of a Thousand Planets）中演特工，更要挑戰喊戲，Cara就大呻難度分勁高，幸而亦「有錢落袋」：「我發現我好難喺人前喊，就算只係得一個人！如果我喊，我想孤單咁喊，因為喊對我嚟講係我要打殘自己，而且個感覺好差，但我當日喺片場學識嘅係，我要好落力去變成弱者。」
電影中Cara與法國名導洛比桑（Luc Besson）合作，由粉絲變拍檔，她形容為「最改變人生的經歷」，還自爆終極夢想是做導演，莫非想做安祖蓮娜祖莉（Angelina Jolie）第二？
拍戲拍上癮的Cara更表示，近期為拍新作狠心暫別酒精，保持頭腦清醒助投入病人角色，她說：「為咗角色我要每日狂操，冥想之外又練瑜伽，總之注意飲食、充足睡眠，同以往嘅喪爆開P生活講拜拜。」認真專業！
除了事業，Cara的情史亦是城中話題，她與女歌手St.Vincent拍拖拍到被傳談婚論嫁，近年Cara更自爆有雙性戀傾向，不過，近日她表示原來連身邊好友都不明白，僅當她是同性戀者，思想十分古老，Cara說：「想像一下如果我嫁個男人，啲人會唔會好似有『佢呃咗我哋』嘅感覺，其實唔係囉！」不過Cara對於現時大家可以大方公開談論性取向，感覺好開心！
文：外娛組