薛凱琪愛情冇絕對：暫時鍾意男人

事業成功 嚇怕男友

歌影兩棲發展順利的Fiona，出道至今先後與房祖名、方大同、賭場外籍高層及一名圈外男傳緋聞，由於Fiona出道13年從未認過拍拖，加上曾被拍到出入基吧，故惹來同性戀疑雲！直至近日被指與圈外富二代秘婚，自認單身的她出席活動時否認傳聞，縱使被不實報道纏身，但無阻Fiona圓童年夢，斥資7位數與好友成立高級服裝品牌四出宣傳，日前她以老闆娘身份穿上自家製最新款上衣接受本報訪問。

Fiona出名孝順及勤力，加盟太陽娛樂後工作排山倒海，最近更一擲3千萬買豪宅，堪稱圈中小富婆。成為女強人的她被問到擔不擔心嚇怕異性？Fiona笑說：「所以更加要搵真愛。」並大方透露入行後曾與圈外男拍拖：「梗係有男仔埋過身，我都係正常女生，之前都拍過拖，不過每次拍拖我都會話自己唔係拍拖，我講過唔會認拍拖，除咗結婚。」隨即大笑說：「不過散咗我又會認散咗。（分手原因？）佢叫我唔好做嘢。（叫你做闊太？）總之叫我唔好咁勤力做嘢！嗰時會諗，自己愈做愈成功，啲男人就愈唔鍾意我做嘢，或者唔鍾意我咁強，到咗今年開始打坐，思維上愈來愈開竅。我覺得未來老公要係一個好有自信、好支持我、好諒解我嘅人。」

歌影發展的薛凱琪為圓童年夢想，與朋友合資創立服裝品牌。	薛凱琪強調單身，因為就算拍拖亦不會公開。	薛凱琪覺得愛情沒有界限，不敢否定將來會否愛上女性。

效法麥當娜領養小孩

今年8月11日踏入36歲的Fiona被問心不心急做人妻？她笑說：「我有對奇怪父母，我愈唔拍拖佢哋愈開心，因為我係獨女，佢哋成日驚我畀人呃，所以我一拍拖佢哋就好緊張，感覺到佢哋瞓唔安、食唔落。」今時今日的Fiona貴為千萬富婆兼事業型女士，問到遇上心儀對象會否發展？她稱：「我成日都話拍拖開心嘢嚟，婚會結，但後少少，當做咗老婆就要做老婆職責。（唔打算生？）依家科技先進，其實所有嘢都係天畀，如果冇嘅話，我立志領養一個，但我嘅男人要有呢個量度，如果佢要我生，我都會生一個同埋領養一個，希望未來老公有呢個胸襟，我想有兩個小朋友。」愛心爆棚的她直認想效法麥當娜及安祖蓮娜祖莉領養多個小朋友：「如果屋企負擔得到，好想好似佢哋領養好多小朋友，小朋友係社會嘅未來，不過唔係個個男人有呢個胸襟。」

升呢老闆娘的薛凱琪自認奄尖，事事親力親為。	祖名薛凱琪傳過緋聞。	方大同均與薛凱琪傳過緋聞。

收埋戀情保護另一半

一直被傳是同性戀者的Fiona，被問是否抗拒同性戀？她說：「真係想講吓，之前有班識咗好耐嘅朋友，問我究竟係咪同性戀者，我好驚訝，問佢哋點解十幾年後先至問我？啱啱又有新聞話我結咗婚，永遠都係出面傳，但唔知邊度(o架)喎。」對於從不公開男友身份，Fiona說：「我唔公開不知幾開心，入行到依家分咗一次半手，點解一次半？因為有個好模糊。分手我喊咗幾耐，起碼唔使交代，我覺得救咗自己同前度，佢又唔使畀人跟同交代。（接受同性戀？）第一我要講我唔係同性戀者，但愛係冇分男女。（唔抗拒？）愛冇得選擇，但我出世到依家知道我係鍾意男人，若果你問我突然間會唔會愛上一個女人？真係唔知，我暫時鍾意男人，我展望嘅另一半係男人，拍拖、結婚、生仔，你話一年後我突然之間可以對一個女人有愛情，我依家答你唔知，我應該唔可以，但有冇呢個可能性，我唔知，我唔可以講我唔會鍾意女人，我唔可以咁樣答，因為唔係事實。」

奄尖Boss最憎抄橋

演藝事業如日方中的Fiona透露，今年初在機緣巧合下獲現時拍檔邀合作推出服裝品牌，更直認品牌價錢偏高，原因用了最好的剪裁及布料，而第一季服裝全送給藝人穿着，口碑極好。Fiona坦言事前做過不少資料搜集：「今次用咗7位數，其實做過調查，一門生意點解唔成功？就係出面Work然後去抄，所以一定要有創意。」擁有強大鞏固團隊的Fiona直認「奄尖」：「我乜都理同好奄尖，奄尖到有時都憎自己，每次設計完我都會改，每次開會要10至12個鐘。依家已經有品牌想同我哋Crossover，亦有內地生意人想投資入股，不過我想逐步嚟。」

文：音樂組

化妝：Jessica Chan@Jessica chan make-up workshop

髮型：Jo Lam@Queen's Private i

服裝：SPIRITUNUS