岑日珈病足年幾：很多東西纏擾我

繼藝人石詠莉早前反覆發高燒入院，曾經被傳獲富豪「照顧」的歌手岑日珈（Angie）亦持續發燒不退。昨日凌晨Angie在社交網上載一張戴眼鏡、口罩的黑白照，一臉病容，又用被包實，身後見有鹽水樽吊住，似身在醫院。她留言：「發咗4日燒，沒有甚麼特別好轉，病到連路也走不動了。」她續留言指患流感，持續發燒至攝氏37.8至40度之間，希望快點精神起來，但之後卻離奇地再留言：「舊屋有很多東西纏繞（擾）着我。」及「我很辛苦。」

愛犬晚晚輪流吠

Angie在電話中氣若游絲透露五日前開始病發，因為發高燒曾經到醫院求診，留院一日打針、吊鹽水後就出院回家休息：「醫院都多病菌，但返到屋企呢幾日反覆有燒，周身骨痛都瞓唔到，有時辛苦到係咁流眼淚水，個人又不停標冷汗。」問她可擔心染上「奪命流感」？她坦言最初並不擔心，但持續發燒不退：「好似冇乜好轉，開始驚係咪嗰隻流感，我呢幾日街都唔敢出，怕惹到人，如果食埋今日嘅藥都唔好，我就會再去睇醫生。」

忙於執拾新屋的Angie聲稱自從入住該4,000呎獨立屋舊居，可能自己「受不起」，曾先後多次入醫院，抑鬱症亦加劇，她說：「總之我覺得好唔妥，入住嗰年幾就一路咁病，如果再住喺嗰度，我諗會黐線！」她更自爆家中對住一棵猶如「手爪」的大樹，感覺似「捉住」間屋，她說：「真係好恐怖，隔籬屋啲樹係好正常生晒樹葉，但嗰棵樹唔知點解突然唔生。」其實當初入伙時，有師傅幫她睇風水，她說：「當時我乜都冇講，但個師傅話棵樹有好多精靈，之後帶咗六、七位法師嚟超渡。」她直認因為害怕，每晚都要落晒窗簾，花園晚上也從不敢亮燈：「之前一決定搬就病，最奇怪係屋企有七隻狗仔，佢哋每晚輪流對住花園、牆、廚房不停吠。」

七犬六貓舉家搬

除了健康變差，Angie也覺得事業有阻滯：「之前傾好兩部電影，準備好晒要開拍，點知臨時有問題發生，兩套戲都冇開到，真係好翹。」搬離舊居的她，形容搬屋是大工程：「如果唔係必要我都唔想搬，因為我有七隻狗、六隻貓，咁大棚家族搬屋真係好煩。」

文：音樂組