港姐台北外景鬥品味 雷莊𠒇勝在Open Kelly拜下峰

《2017香港小姐競選》12位候選佳麗昨日出發到台北拍攝外景，抵埗後到台北東區一所時裝旗艦店，穿上自選服飾被潮流達人品評品味。23歲雷莊𠒇（Juliette）身穿黑色透視裙，真空上陣騷半球，大晒驕人身材，相反兩位大熱「仙氣李若彤」伍樂怡（Kelly）及張寶兒胞妹張寶欣穿上便服配牛仔褲，風頭被搶。

Juliette表示揀這套衫是想表現自己思想開放的性格：「我喺外國長大，喺法國、英國都讀過書，成日做運動，對自己身材有信心，不過見到大家反應，明白香港文化同外國唔同，第時要着得保守啲。（不如下次再性感啲？）我冇問題呀！如果喺外國咁着都冇嘢。（平時都咁性感？）睇場合，返工就唔會，有時去派對會性感啲。（其他佳麗反應好大？）唔會，大家明白好啱我性格。」

張寶欣變「莫札特」

Kelly表示導師也覺得其打扮太隨意：「我會接受意見，着少啲牛仔褲，呢套衫係想精簡啲，凸顯自己氣質，平時都鍾意簡單。（男友唔想你太突出？）唔係，係自己鍾意舒服。（雷莊𠒇搶晒鏡喎！）係呀！佢鬼妹仔性格。（你呢？）我就接受唔到！（你最性感係點？）好似依家露少少膊已經好性感喇！」張寶欣則自嘲不懂打扮，平日經常着錯衫：「着長裙會踩到裙尾，有套衫個袖好多褶，又畀朋友笑我係莫札特。（性感呢？）騷鎖骨已經好性感。（泳衣環節點算？）仲有幾日，冇諗呀，有啲驚！」

伍樂怡會減少着牛仔褲。	張寶欣試過自踩裙尾。	黃凱琪（左）與邱晴帶備防曬用品去台北。

黃凱琪緊張着泳裝

此外，昨晨一眾佳麗與袁文傑在香港機場出發時，最高有5呎10吋的黃凱琪透露準備藍色比堅尼應付自選泳裝環節：「第一次着泳裝拍攝，平時唔多去沙灘，心情幾緊張。（Keep Fit？）冇乜，只係去咗上健身課程拉筋。」至於年紀最細、17歲的邱晴現時125磅，比之前瘦了1磅，她笑言已盡力減磅，擔心泳裝環節體形上會輸蝕，望以自信搭夠。

攝：鄭家俊