失蹤四日慶幸尋回 黃又南還老父公道：佢絕對唔係負累！

黃又南63歲的父親黃文藻早年曾因腦退化症失蹤，上周三（12日）傍晚他再度失蹤，慶幸周日（16日）尋回。又南昨日到經理人公司接受訪問時表示：「當日晏晝我出去做嘢，點知六點鐘媽媽打畀我話爸爸唔見咗。原本嗰晚我要去睇舞台劇，直情冇去，揸車周圍搵，去啲覺得爸爸會出現同由細到大住嘅地方搵。」可是遍尋不獲，與經理人及朋友商量後決定報警，警方聯絡八達通公司知道爸爸每日都用過八達通。又南稱周日警方致電他媽媽指已找回父親，即揸車到紅磡警署接老父：「第一句問爸爸有冇受傷？OK唔OK？肚唔肚餓？爸爸仲答我冇事，精神狀況OK，只係瘦咗，搵番佢時如釋重負。」他坦言在父親失蹤期間，母親背負的壓力最大。

澄清冇欠賭債

對於曾幫父親還債一事被重提，又南再為父親澄清：「佢絕對唔係我嘅負累！我爸爸係我偶像，係我動力，佢冇因為生意失敗而沉迷賭博，希望大家還佢一個公道。」他稱父親一直有食藥，事發後有帶父親做詳細身體檢查，未知其腦退化症去到甚麼程度。他堅持與家人同住，藉此多些時間陪家人。又南表示一早已訂購GPS定位系統給父親，可惜失蹤前仍未收到：「爸爸依家已經有人睇住，媽媽壓力都減少咗。」他指自從父親患上腦退化症後，他亦有上網了解病情，會樂觀面對。

又南指父親失蹤，母親承受的壓力最大。	又南正忙籌備明年三月的演唱會。	天佑（左）指又南尋回父親後終於鬆一口氣。

天佑力撐拍檔

而又南的好拍檔兼兄弟徐天佑受訪時，坦言自己應該是第一個知道此事的人：「嗰日因為有啲事我咁啱要打畀又南，聽到佢把聲好焦急，作為身邊朋友，都好擔心，惟有精神上支持佢。見又南搵番爸爸後，佢心情都好番好多。」他又無奈表示自己身邊有好多親戚、老人家患有腦退化症：「最緊要睇緊啲，呢啲嘢都冇辦法，見到又南心情好番啲都安心，我哋依家要為出年三月演唱會作籌備，佢可以安心工作，我都祝福Uncle情況穩定。」

文：影視組