美國小報《國民問詢報》日前驚爆一場「世紀拳賽」正在醞釀中，一班俄羅斯富豪出價約390萬港元，邀請美國前重量級拳王泰臣與俄國總統普京在擂台互揪！
據報道所指，一班俄國富豪玩到冇得玩，竟想到花390萬港元邀請拳王泰臣（Mike Tyson）「打」俄羅斯總統普京（Vladimir Putin），更已親身提出邀請：「泰臣依家喺紐約出席活動，咁啱活動就係由俄羅斯富豪負責主辦，所以活動結束後就會帶泰臣返國打番一Round。」不過暫時未知泰臣意下如何，是否夠膽「出山」去人哋地頭打大佬。
51歲泰臣是重量級拳王就人所共知，但64歲的普京亦唔嘢小！事關普京小時候生活的社區治安極差，令他不時與較自己強壯的男孩打架，他11歲已學習摔跤，其後又決心學習柔道，成為黑帶高手，橫掃不少比賽！加上普京熱愛運動，當中尤愛冰上曲棍球，又堅持每日起身做30分鐘體操、再游水20分鐘、夜晚再加操健身一個半小時，所以64歲都仍Keep得一身肌肉，不時晒肌騷Quali，絕對唔只食過夜粥咁簡單！
至於泰臣就不用多講，他的各種必殺技，例如左勾拳、拳重約385磅的右手重拳及快速組合拳每每置人死地，他在58場比賽中，44場都成功KO對手，歷年來從拳賽中已贏得約23億港元獎金！不過，已退休12年的他高掛拳套，近年主攻影壇，除了數年前客串荷里活賣座喜劇《醉爆伴郎團》（Hangover）系列及《閨蜜2：無二不作》外，亦曾參演港產片《葉問3》與甄子丹對打，為人津津樂道，最近又接拍國產片《中國推銷員》，片中與荷里活著名「打仔」史提芬史葛（Steven Seagal）對戰。不排除近年轉攻幕前的他拳術已生疏，與普京對打，誰勝誰負都難講！
文：外娛組