大隻仔羅仲謙冇樓冇雄風！為氹楊怡Chur乾個胸
男人胸女人Home正正係大隻仔羅仲謙嘅寫照，為咗安樂Home，謙謙喺呢三年不斷等上車，屢戰屢敗，又屢敗屢戰，買到嘅都係得陣風。如今呢位大隻仔，連胸都縮埋，老婆楊怡一早有樓揸手，自己就兩手空空，都咪話唔醜！最陰功豬係，謙謙Budget有成1,000萬，但原來1,000萬都係得個吉，惟有講句，合該！
今年5月，我Nuts哥陪朋友去抽荃灣一個新樓盤，當日現場熙來攘往，人流如鯽，場面就好似Welcome聖誕大特賣。只見人群中，有位仁兄一支公笠住口罩戴上眼鏡頹然呆等，見佢面如土灰，雙眼無神，原來正正係大名鼎鼎嘅羅仲謙，睇到佢個樣都知，謙謙又衰咗喇！
1,000萬Budget都貶值
老婆楊怡不斷Push謙謙買樓，見佢心急如焚，就知上車對佢嚟講幾有迫切性。查實謙謙想搵番個男人Home啫，點解仲難過DSE考5**？2015年開始，謙謙就變咗新盤吉祥物同展覽品，Nuts哥有次上討論區，口痕友話見羅仲謙仲易過喺九龍城見周潤發，只要去新盤抽籤揀樓現場，野生捕獲謙謙包冇甩拖，萬試萬靈！
灰！真係好灰！身為升斗香港市民，睇到Nuts哥寫到呢度，就一定灰到嘔黃膽水，因為有1,000萬Budget嘅謙謙都話：「一直都想買屋，之前想買又抽唔中……依家買樓又要排隊……以前1,000呎叫豪宅，依家500呎已經叫豪宅。500、600呎可以畀到一家人住，一個單位就夠。」
地獄黑仔王欠抽樓命
隔籬街順嫂話齋，冇錢冇車冇樓學咩人娶老婆？謙謙係有錢，又有架多功能用途嘅車，就係冇樓呀！偏偏佢就係地獄黑仔謙，冇抽樓命，又怨得誰？為振夫綱，佢退而求其次買工廈頂住檔，安樂Home呢？就要靠每月4萬幾蚊租大埔比華利山幫人供樓。北上拍劇漸消瘦唔係藉口，真正Chur乾佢個胸嘅元兇係買唔到樓。
謙謙搵錢係辛苦嘅，佢即將又要同楊怡分隔半年，飛到外地拍無綫新劇《再創世紀》，拍得呢套作品，當然一定要熟讀《創世紀》經典角色許文彪（陳錦鴻飾）金句：「我唔係未試過，我試過安分守己，日搏夜搏，賺得嗰一萬幾千，我試過……你出去問吓人，是但問一個人，問吓佢哋想要啲咩！佢哋答案好簡單，只係想要一間好普通好普通嘅樓咋。」文彪金句正係謙謙同香港人嘅寫照呀！
謙謙同楊怡話生B講到口水乾，慘在冇樓冇高潮，冇樓冇雄風，連團火都熄埋點算？萬事起頭難，點解唔退一步海闊天空呢？倒不如唔揀旗艦新盤，Freestyle啲買二手樓，去元朗、屯門、大西北，掃二、三、四、五、六手樓，1,000萬買到兩間，一間放租，一間用嚟做多功能用途神秘屋。造人要講情趣，細細哋闢室偷香仲過癮！第日生埋個B，話唔定腳頭旺你儲到一億，進軍幾千呎半山豪宅呢！Who Knows？！