余香凝壓力爆煲驚現鬼剃頭
藝人余香凝（Jennifer）昨日到電台宣傳她首隻歌《你愛的人上》，剛拍完電影的她自爆壓力太大導致右後腦出現鬼剃頭，範圍大約像手指尾頭般，並透露3年前首次拍電台劇集時亦試過：「兩次我都以為自己冇壓力，瞓到、食到就以為冇嘢。之前喺頭頂，會成日照鏡睇吓頭髮生番出嚟未，依家見唔到就好啲。」她自言壓力仍未消失，因為本月28日將首次自彈自唱新歌，很擔心彈錯或走音，因此會做運動放鬆心情。前日她就在社交網站上載身穿運動背心的照片，展露腹肌和逼爆上圍，大晒健康性感！
做演員牽動情緒
至於新歌的歌名，她解釋是信件下款，代表歌曲由你愛的人所作：「點解我會由演員去到作歌？因為做戲畀到情緒我，以前做模特兒所有嘢都好直接，但做演員就接觸到社會百態，要拎出自己感情。」她透露每天回家都有很多情緒，就算很疲倦，只要想到新旋律都會用手機錄下來。
男友陳家樂呷醋
她透露新歌靈感出現於某天凌晨：「突然諗番起我19歲嗰時屋企人分開，我好唔開心，有啲抑鬱，日日喊。當時識咗一個好好嘅男仔，好搞笑，成日令我笑，有諗過同佢發展，但爭最後一步冇一齊。」她認為兩人性格不合，會很快就分手，但感激對方曾經出現，亦希望歌曲能引起大家共鳴。問到男友陳家樂可會呷醋？她笑說：「佢都有話我唔係作畀佢，我叫佢送首歌畀人，我好大方嘅，佢聽呢首歌嘅時候都會諗起對自己好嘅人。」她表示正在準備下一首較為甜蜜的歌，想表達有任何事都會支持對方，男友亦有提供意見。
文：音樂組