阿倫怕惹流感：有醫生紙先錫！

「歌神」許冠傑（Sam）及「校長」譚詠麟（阿倫）將於8月12至21日假紅館舉行《阿SAM & 阿TAM HAPPY TOGETHER演唱會》，昨日兩人為演唱會綵排，穿背心的Sam影相時舉高雙手，大騷麒麟臂，阿倫則搞笑地凸出肚腩與對方較量，笑說：「我點鬥？人哋搽晒油嚟！」

夏威夷秘密操肌

受訪時，講到企在Sam旁邊會被比下去，阿倫即笑說：「唔緊要，佢係我偶像，我點都唔敢練，係刻意唔練嘅！」又透露其實已減了8磅，目標再減半磅！Sam就表示因非常重視今次演出，所以之前在夏威夷特意找健身教練操了兩個多星期，每日訓練三小時：「今次做好多場，又有分日場、夜場，同埋會跳好多舞，所以要Fit啲，唔係暈低就慘！」阿倫又透露原先計劃倣效Sam錫台下粉絲的傳統，但因現時流感太厲害，令其計劃有變，他抵死地說：「大家要拎醫生紙嚟我先會錫！」

Sam一向開騷都例牌咀觀眾，唔知今次會唔會照舊呢？

阿倫自言因Sam是其偶像，故刻意唔操肌以免搶其風頭！

爆歌神係宅男

問到Sam是否找聲樂博士練聲？阿倫竟代答，並隨口說出一個英文名，Sam即忍不住笑說：「佢成日幫我作嘢，係商業奇才嚟，識諗好多宣傳招數，所以個騷先咁快賣晒飛。（對住佢好勞氣？）唔會，好玩嘅。」而阿倫就澄清是奉許冠文之命行事：「佢話Sam係『宅男之父』，匿咗喺屋企幾十年，出面嘅嘢唔太知，叫我將佢嘅人生觀輕輕扭少少，佢嘅生命就會充滿色彩！」

文：音樂組

攝：秦健輝