直播海旁求婚成功 啤梨護花避談女友情史
今年43歲的DJ葉文輝（啤梨），前晚在Facebook直播向拍拖4年的圈外女友Michelle求婚，啤梨在鯉景灣海旁突然拿出大紮紅玫瑰，令Michelle不知所措說：「唔係搞啲咁嘅嘢呀？」二人的親友不停歡呼，啤梨就攬住女友。其後海上一艘郵輪的巨型LED燈顯示出「MICHELLE WILL U MARRY ME」，啤梨拿出戒指跪地求婚，女友眼濕濕點頭答應，郵輪即顯示「YES I DO」，據知啤梨這次郵輪放閃花費十萬元。兩人在親友起哄下又攬又錫，啤梨對女友發表愛的宣言：「我唔識氹你，掛住做嘢，唔識畀驚喜你，但我會好好照顧你，當我好肥嘅時候你都冇走，希望我會變番靚仔。」
大讚女友冇怨言
昨日Michelle陪啤梨返電台，二人十指緊扣接受記者訪問，啤梨坦言很開心得到很多人祝福。問Michelle是否完全估唔到？她甜笑說：「唔知呀。（畀佢嚇親？）有驚喜。（唔想佢搞大龍鳳？）有少少驚，怕醜。」啤梨大讚女友對自己沒有怨言，因此想給對方驚喜，並為此構思多時，Michelle自言完全沒發覺對方有古怪。談到前歌手徐浩於2011年在方大同演唱會上，曾公開向Michelle求婚，她避談說：「唔好講啦，呢啲過去。」啤梨亦說：「過咗去唔好講啦，新嘅開始。（女朋友有冇結過婚？）冇，我哋兩個都未結婚。」而徐浩受訪時表示：「當時大家都未夠成熟，結不成婚，現她找到幸福會送上祝福。」
由工作到有感覺
啤梨在薛家燕的電台節目表示透過女友的上司認識女友：「最初只係工作，慢慢就有感覺。（你好揀擇？）係，或者係人哋唔揀我，我女朋友抵得諗，係善長仁翁。」他笑指自己經常做義工，所以現在有好報，又覺得兩人很夾：「以前我拍拖收得好埋，連朋友都唔係個個講，但同佢一齊就好舒服，冇收埋。」啤梨自爆求婚後兩人都很疲倦，回家就睡覺，未有討論婚禮細節，今晚他會到銅鑼灣舉行音樂會，女友或會出席：「呢兩年我都係做DJ同司儀，好掛住唱歌。」
文：音樂組