學友大女張瑤華冇仔陪 單拖行街快閃
張學友的16歲大女張瑤華(Zoe)，早前與外籍靚仔Mathis的攬攬照流出後，即引起熱話，一直甚少蒲頭的Zoe，前日現身中環行街，穿上背心、貼身運動褲的她遺傳媽咪羅美薇的優良血統，身形Fit爆！全程冇仔陪的Zoe極速逛了數分鐘便閃人。另邊廂，體形脹爆的欣宜同樣現身中環，大熱天時竟穿長袖衫褲，真係睇見都覺得熱！
「歌神」張學友與羅美薇結婚多年，育有兩名千金瑤華和瑤萱，學友一直對兩個寶貝女十分保護，絕少讓她們曝光。不過大女Zoe就喜歡在社交網上分享靚相，早前在網上晒與外籍靚仔Mathis的攬攬照，並留言互「Love」，疑她情竇初開，事後學友則開腔為女兒澄清現時沒有拍拖。
揀唔啱心水
長得亭亭玉立的Zoe前日下午5時半，乘坐爸爸平時代步的七人車往中環，身穿白色背心、內裏襯深色Bra Top、貼身運動褲的她，充滿陽光氣息，完全遺傳媽咪羅美薇的優良血統，身形Fit到爆。甚少蒲頭的Zoe落車後即往運動用品專門店行逛，並到上層選購跑鞋，但冇仔陪的她逛了不夠五分鐘，似乎揀唔啱心水，乜都冇買轉身閃人。等過馬路時，見Zoe不時低頭撳電話，之後單拖進入附近一幢商廈。
欣宜包冚唔覺熱
另外，早幾日才在社交網上載了水着「Big」爆相的鄭欣宜，當日亦現身中環行街，「分量」十足的她在炎熱的天氣下竟穿長袖上衣及牛仔褲，收起咪咪打扮密實，睇見都覺得熱！不過欣宜面不改容，與兩友人行完街在該處等車，期間有傾有講，之後齊齊上車走人。
文、攝：追蹤組