「有錢男」急徵出租女友？ Jessica@SG被開價20萬上郵輪過夜

近年不少女藝人都被「問價」及收到「飯局」邀請，當中甚至有人列明價錢利誘她們做「出租女友」。SG成員Jessica日前亦收到「邀請」，她上載一名自稱「有錢男」的網友邀約短訊截圖，內容為：「I would like to pay you for shopping and dinner.You interest？（我想畀錢同你購物同食飯，你有冇興趣？）」抵死的Jessica在截圖寫上：「Seriously？咁大隻蛤乸隨街跳？」

得啖笑 拒賺快錢

Jessica昨日接受電話訪問，她認為事件只是一場惡作劇，並自爆與好姊妹Cheronna「開心Share」時被取笑：「佢話我見識少，話網上依家有Partime Girlfriend（出租女友），我真係唔知，究竟依家咩世代？」問到是否經常收到邀約短訊？她說：「好少睇inbox，係咁啱開嚟睇，覺得好好笑，每次見到都會同好姊妹分享。」問到是否心動做出租女友？她堅定地說：「冇！擺明搞笑啦，點會發生喺我身上？」

小康之家出身的Jessica認為做人最緊要腳踏實地，以及靠雙手努力賺錢，她透露早年收過一個邀約訊息，有人出價20萬邀請她上郵輪：「話畀20萬我上郵輪過一晚夜，其實每次都當惡作劇，亦唔會理。嗰次都有同姊妹傾，大家都係得啖笑，仲開玩笑話原來我值呢個價！」問到她會否對「出租男友」有興趣？她笑說：「畀錢人哋陪自己食飯、買嘢，咁我寧願留喺屋企！」

Cheronna取笑「大鄉里」

至於Cheronna戲稱隊友是「大鄉里」，又取笑Jessica愚蠢：「有睇佢個Post，佢真係唔知咩叫『出租女友』，新奇、電腦技術嘅嘢佢完全唔識，真係大鄉里！」近日與夏雨兒子黃奕晨公開戀情的Cheronna，坦言沒收過問價邀約，並笑說：「啲人對我冇乜興趣，亦冇人想問我價。」

文：音樂組