林芊妤被誤會智商低捱藤條離家出走

性格大情大性，感覺洋氣的Coffee，生於傳統福建家庭，兩歲起一家四口由內地移居來港，搬到灣仔一間板間房跟爺爺、嫲嫲和姑姐同住，居住環境雖然擠迫，Coffee卻十分懷念與家人擠在一起的感覺：「嗰陣我哋一家四口瞓一間房，我同哥哥瞓上格床，爸爸媽媽瞓下格。雖然好逼，但一家人可以成日傾吓偈，感覺好溫暖。」她帶大家去到小時候住的地方，細訴童年往事，首先到天台緬懷一番：「呢度都冇咩變，細個我成日同哥哥上嚟玩，一齊瞓喺度望住個天，好開心！依家有時唔開心，我都會特登上嚟呢度自己靜吓！」

爺爺嫲嫲疼錫

回到小時候的家門口，Coffee不期然想起照顧她的爺爺、嫲嫲，並感觸地說：「爺爺、嫲嫲好錫我，雖然我哋係傳統福建家庭，比較重男輕女，所以哥哥會比較受重視，但爺爺、嫲嫲一樣好錫我，永遠當我係小朋友。我哋細個一齊住，放學之後佢哋會煮定嘢畀我食！不過我讀中學嘅時候，爺爺就走咗……」語畢Coffee忍不住流下不捨之淚，一頓才說：「我依家都會諗起爺爺叫我嘅聲音，會好掛住佢，依家得番嫲嫲，會盡量陪佢多啲。」

Coffee站在舊居大廈門前，細說往事。	Coffee是瑜伽高手，與兒時愛在遊樂場玩有關？	小心呀Coffee，企喺鋼架咁危險。

小時候她和哥哥在家會玩甚麼？Coffee笑說：「小學嘅時候會同哥哥喺學校攞啲白色粉筆返屋企，整碎佢周圍撒，小朋友唔好學！但玩完之後，次次都係我去抹番乾淨，因為哥哥會嚇我，如果唔抹就話畀爸爸媽媽聽係我整嘅，我次次都畀佢嚇到，哈哈哈！」

呢間就係我讀嘅小學喇！（設計對白）	瀡滑梯	Coffee童心未泯爬鋼架。

突然開竅 叻過阿哥

下一站Coffee返到小學，更大爆小學二年級曾留班，被家人誤以為智商過低，她說：「我9月出世，讀書嘅時候係細B，返學時完全唔知發生咩事，屋企人甚至以為我特別蠢過人，所以冇再勉強我讀書，將希望放晒喺阿哥身上。但去到三、四年級我突然開竅，成個人唔同晒，到最後我讀書好過阿哥好多添！」不少女生也會害怕數學科，Coffee也不例外：「我由小學開始，數學科從來未合格過！但去到中學，我竟然讀經濟，真係估唔到。」

面前的Coffee跳跳紮，非常健談，有誰想過她小時候，寡言到讓家人決定帶她去接受語言治療，她說：「細個唔識表達自己，唔同人講嘢。去咗見治療師之後，發現原來係因為我覺得冇人錫，所以唔開心、唔講嘢！到咗小學四年級，體育老師叫我加入籃球隊，之後我成個人開朗晒，屋企人以為我喺外面識咗啲唔好嘅朋友。」

保持童心

提到小學的趣事，Coffee滔滔不絕，其中一件甚至影響她往後的人生：「小學參加咗籃球隊，放學要練波，但爸爸唔畀我夜返屋企，佢覺得放學應該即刻返屋企，有時我偷偷地練波，返屋企就會畀佢『藤條炆豬肉』！」因為這個原因，一向乖巧的小Coffee，做出人生第一次「對抗」：「爸爸打我嘅痕迹，畀其他同學仔見到。有次我去女同學屋企玩，就發脾氣話要離家出走，唔返屋企！點知同學仔嘅媽咪都好贊成，話要嚇吓爸爸，令佢唔好打我，就係咁我留喺同學屋企五日。到我返屋企時，已經過咗中一入學註冊日，最後搞到要轉校，好慘呀，以後都唔敢喇！」

最後一站，Coffee去到小時候經常踏足的遊樂場，雖然很多設施已改變，但不變的是她的童心，Coffee說：「呢度好多嘢都唔同咗，但係返嚟呢度勾起我好多童年回憶。我覺得做人最緊要保持童心，咁人都開心啲！」

文：盧嘉靜

攝：黎志輝