林作扮處男追女10秒定成敗
十優港姐麥明詩前男友林作，將於書展推出英文書教追女仔，身為前大律師的他揚言追女仔是靠口才而非錢財，不過，他坦承自己拍拖次數五隻手指數得晒，又自嘲可能會孤獨終老。
今年會在書展出書的林作表示，新書主要教英文，追女仔只是賣點，他自爆在英國讀書時甚少拍拖，拍拖也是拍長拖，現年27歲的他說：「讀書到依家，認真拍拖嘅女友數目五隻手指之內，最長拍拖3年。」
自爆情史
林作分享追女仔之道，他認為最重要是開頭十秒，還要爆金句，這決定大家是否可以再進一步，而16歲時追求初戀對象令他印象難忘：「我第一句就同佢講，你好靚好正，但你唔係我鍾意類型，呢句好Work，嗰十秒佢已經被拋棄，好多人會怕醜，但我好誠懇。第二樣係話佢唔係我嗰Type，佢同時經歷高潮同低潮，就會好記得你。下一步，千祈唔好用追求方式，用想成為你最好朋友去發展。」第二個女友是19歲時認識，他說：「我同佢講我係處男，令佢印象深刻，佢擺明知我唔係啦！」
林作坦言從來都是靠內涵及口才去追女仔，而不是靠物質：「我有一個前女友公開咁講，我係佢拍過拖嘅男仔之中，最窮嘅一個！我向來都知物質上我比唔上佢周邊嘅男仔，要玩呢啲，我玩唔起！我唔會傷心，呢啲係事實，我係賣才華內涵。」
扮女人露點
不過，林作現時不講感情，只想專心事業，問他何時成家立室？他竟懷疑自己會孤獨終老：「我試過被拋棄，我好念舊，通常都係我不再被需要，可能事業去到某階段，另一方想要其他嘢，未必想要我喺身邊。」
言行出位的他，昨日在社交網上載了一條短片，他在片中戴上假髮、露香肩扮女人，更因動作過大而露點，認真重口味！不過，竟然有網友讚他男扮女裝好靚女，不輸麥明詩，不知麥明詩看後會有何感想呢？而前天他又上載了腳踭受傷的相片，留言：「出血事小，入波事大。」
文：名人組