阿佘唔認Dry死撐有滋潤

王晶監製的無綫劇集《賭城群英會》漸進入高潮，上周平均收視24.9，成績不錯，昨日佘詩曼、陳法蓉、馬國明、謝賢、陳百祥等出席宣傳造勢，當中麥明詩穿上透視喱士裝晒Bra上陣，並谷出4吋事業線，令高海寧、沈卓盈等咪神頓時被比下去。

阿叻揶揄謝賢溝女

謝賢與阿佘在台上講個不停，阿叻見狀即揶揄四哥只顧溝女，但轉頭卻大讚阿佘好戲，指她於劇中望馬明的眼神，如同真的愛上對方，阿佘即說：「我投入？我望住你都可以咁！」不過阿叻卻反駁：「我識你老母o架！你參選時我已經知你係咩人！」搞笑非常。

事後阿佘受訪，對於港姐師姐陳法蓉被指Dry爆8年冇拖拍，亦拒收觀音兵，問到阿佘可有收觀音兵？她說：「我依家好開心。（有新戀情？）有人追都唔得啦！我咁忙。（即係有人追？）冇喎！搵錢唔開心咩？（咁你Dry咗幾多年？）我梗係話冇啦！死都要咁講，我一直都滋潤住。（阿媽湯水？）唔好理，總之就滋潤啦！」

麥明詩透Bra一出，眾咪神都要讓位。	王晶（右）率領一眾演員為熱播劇造勢。	高海寧（右）、沈卓盈「冇料到」輸晒！

王晶不願再提是非

至於王晶被問到近日與黃秋生隔空開火言論，他不願多談：「唔講呢啲無謂人。（但呢個人都成日出現？）佢得閒有咩辦法，我好忙。（嬲唔嬲？）一啲都冇喎！（秋生話你？唔係朋友！）向來都唔係好朋友，反而同杜汶澤就有一段時間係好朋友，你睇我仲有冇講過佢唔好嘅嘢？」

文：影視組