吳業坤升呢去沖繩鋪路爭三連霸
「貼地歌手」吳業坤獲唱片公司落重本投資6位數，首度衝出香港到沖繩拍MV，以銀彈為明年頒獎禮的三連霸鋪路；三日兩夜行程中，坤坤有靚車揸、有女陪，更有10人大軍服侍，今時不同往日的他更自資開拓日本市場，望可揚威海外！
坤坤簽約星娛樂後，為配合其屋邨仔的「貼地」形象，多個MV圍繞在香港的天台、學校及公園取景，且是數萬元的「平民」製作。但隨着周柏豪、許廷鏗（Alfred）等各做所屬唱片公司的「一哥」後，其唱片公司即加大力度，為坤坤爭明年頒獎禮三奪「我最喜愛的男歌手」獎而造勢，花30萬讓坤坤首次衝出香港到沖繩拍新歌《傷心到變形》MV，還出動「宅男最愛」大黃蜂跑車，以靚景、靚車襯托其「一哥」地位。而三日兩夜行程中，坤坤有10位工作人員跟隨拍攝外，還有女陪食、陪玩、陪開工，幫他噴太陽油護膚，受寵程度跟當年在無綫台慶中扮「棋」的他有天壤之別。
左軚辣跑險炒
昨日坤坤接受電話訪問時謙稱：「唔關我『升呢』事，只係呢首歌喺沖繩創作，況且係講正能量，有時傷心都有用o架，覺得好啱去沖繩拍MV。（全程有女陪喎？）係呀，佢仲早一日去沖繩機場接我機添，好鬼Sweet！（新女友？）佢係我阿媽，佢好好招呼。」問到揸大黃蜂跑車拍MV是否好爽？坤坤大讚：「鍾意揸車嘅男仔都想揸吓呢款車，不過我差啲炒埋，因為太大架，同埋係左軚車。」
許廷鏗冇得比
問到可有趁機在日本識女仔？他搞笑說：「識咗個大叔！」又稱臨返香港那晚獨自到食店包場食消夜，三小時的消遣過程很愉快：「我同嗰個大叔店主用簡單日文及英文單字傾咗成晚，我有介紹自己係香港歌手，畀啲歌、演唱會片佢睇，佢讚我好犀利添！（進軍日本市場？）都係o架，希望佢幫我宣傳吓，所以我畀咗100蚊美金（約780港元）佢！（咁豪？）返香港諗起都覺肉赤，其實嗰餐應該500蚊港元左右！」
談及好友Alfred同樣推出以正能量為主題的新歌《根》，問可怕被比較？坤坤自覺「冇得比」：「佢首感性啲，我首快樂啲，兩首都好聽，不過我首歌喺香港暫時係幾獨特嘅題目嚟！」
文：音樂組