林奕匡巴黎影婚照 遭陀地恐嚇
歌手林奕匡（Phil）將於8月做「老襯」，在成長地加拿大舉行婚禮。早前他與未婚妻李靄璣（Rikko）飛到法國巴黎影婚紗相，兩人走訪多個名勝地，包括巴黎鐵塔、聖心教堂，更到電影《飢餓遊戲》拍攝地Les Espaces d'Abraxas及較偏遠的大諾瓦西鎮取景。
好彩落大雨
由於大諾瓦西鎮的市民較窮，當他們拍攝時，被一班陀地恐嚇，講到明要畀錢才能拍攝！Phil說：「佢哋本來坐喺一邊，見我哋影相就走嚟話要收錢，說話好有挑釁性！好彩當時突然落大雨，佢哋為咗避雨走開晒，我哋等停雨同埋趁佢哋未返，即刻快快手影完走，依家諗起都幾驚。」
想買色士風
雖然拍攝途中遇上驚險事，但無損兩人心情，應攝影師要求擺出多個甜蜜姿勢，期間發生不少趣事，Phil說：「記得有一張相擺咗個Moody有型甫士，但係Rikko就露出甜美笑容，表情相差太大，真係好好笑。」Phil對當地一支4萬港元的色士風愛不釋手，但擔心不能攜帶上機，最終惟有放棄。
文：音樂組