黃凱琪晒長腿 伍樂怡心紅搶Fo
昨午6位準港姐到中環參加直播活動，以身高取勝的黃凱琪大騷長腿，愈戰愈勇。而熱門「仙氣李若彤」伍樂怡被發現心口紅到「一撻撻」。
本屆12位準港姐兩日分兩批到中環，參與無綫big big channel「快問快答」直播，昨日輪到伍樂怡（Kelly）、黃瑋琦（Emily）、黃凱琪（Suki）、胡美貽（Nicole）、雷莊𠒇（Juliette）及邱晴（Mandy）亮相，吸引不少途人圍觀，場面熱鬧。
伍樂怡甫到場即被發現心口紅到「一撻撻」，她靦腆解釋可能是天氣太熱影響。對於日前被指「跌Watt」，她解釋：「其實早排感冒，依家算好番，不過仲有兩聲咳。（監製話仲可能會淘汰佳麗。）有少少驚訝，未聽過，但對自己有信心，盡力做好自己啦！（覺得自己似唔似李若彤？）佢好靚，我唔敢評論，我覺得自己似爸爸。」談到直播答觀眾問題，她笑指「無事不可對人言」，又指家人與男友都有心理準備隨時被起底！
邱晴決定減10磅
而黃凱琪憑着身高5呎10「突圍而出」，昨午大騷長腿。談到要「快問快答」，她自認平日轉數較慢：「呢方面要好好學習，我讀書數學成績最差，同學就攞啲數學題嚟難我。（台灣外景準備咗未？）未知行程係點，所以未開始。」
至於9月將踏入18歲的「嫩版李珊珊」邱晴面對傳媒表現緊張，她說：「一向好怕醜，參選都係想挑戰自己，會喺屋企對鏡多作練習，又或者搵身邊人傾偈。（同網民分享啲乜？）美食同畫作。我係為食妹，但依家決定要減10磅，平日只係食蔬果同雞肉，有媽咪同我一齊整愛心飯盒。」
文：影視組