Twins槍頭對外懶得嗌交

蔡卓妍(阿Sa)及鍾欣潼(阿嬌)組成的Twins在樂壇寫下光輝16年,兩人由互不相識,到今日成為好姊妹,一凹一凸非常合拍,兩人互補不足,阿嬌深受阿Sa影響,整個人都變得有色彩,阿Sa視阿嬌如公主般呵護,從不拗撬、爭仔,更加不會搞是非,兩人目標一致,槍頭對外!

阿嬌和阿Sa都自覺很了解對方,阿嬌說:「我係一個好安靜、內向、慢熱嘅人,好少主動識朋友,但自從識咗佢之後,我就笑得多、講嘢多咗,着衫都色彩多咗,佢係有影響到我,同佢一齊好好笑,我覺得自己算係開朗,只不過身邊冇乜人令到我去笑,或者敞開我心扉,但我覺得佢真係好笑。」

人少分錢多

阿Sa就直指認識的阿嬌成日變,她說:「佢好飄忽,係虛無飄渺,由第一日識佢開始就覺得有一種感覺,你係好想去保護佢,雖然佢係好tough(硬淨)嘅一個女仔,可能佢外形,你會好想保護佢,好想氹吓佢、愛錫佢,好似對公主咁樣,佢係需要有人指引住,我覺得咁幾好。」阿嬌笑說:「如果我哋兩個都好強硬就弊。」在工作上,阿Sa坦言會做決定,而阿嬌則好鍾意聽命令:「我哋係互補型。」

樂壇很多組合總是合久必分,或者意見不合鬧不和,她們笑說:「好彩我哋組合得兩個人啫!」阿嬌笑言人少分錢都有好處:「人多分走晒啲錢。」阿Sa表示她與阿嬌個性都比較男仔:「有啲人好姿整、又搞小圈子,又講是非,我哋兩個講嘅是非都係向外。」阿嬌即說:「所有人問我關於阿Sa嘅嘢,我都唔會講。」阿Sa也和應:「我哋從來唔會講對方,亦都唔會judge對方任何嘢。」她們的槍頭永遠一致對外,最難得兩人由相遇至今,一起走過這麼多個年頭,大家的目標都是一致。

打眼色溝通

Twins雖然不是孖生,但阿Sa和阿嬌似足兩生花,在公在私兩人都很有默契,阿嬌說:「我哋唔使多講,或者打個眼色。」阿Sa說:「我哋成日見,有啲嘢唔係話magic,我哋真係有訓練、有習慣,因為十幾年算係日日見,做嘢時間又長,大家又有共同嘅朋友。」阿嬌說:「我哋唔使將我哋發生過嘅事、唔開心嘅嘢,講畀啲朋友聽,因為會覺得好攰,但同佢我就乜都唔使講,因為大家經歷一樣。」阿Sa接着笑說:「可能一嚟就已經問重點,問吓嗰個核心嘅內圍。」

阿嬌為生靚B謝絕醜男

Twins各具美態,身邊一直不乏追求者,兩人可有試過爭仔不和?她們稱絕對不會,阿Sa說:「完全零可能性,我唔會同一啲同我朋友一齊過嘅男仔一齊。」阿嬌說:「大家鍾意嘅都唔係同一Type嘅人,勁冇可能。」她的擇偶條件,首先外形不要太醜,阿嬌笑說:「因為希望我生個BB出嚟係靚,如果生個仔出嚟似爹哋,個爹哋唔靚仔咁點算?」阿Sa不禁笑說:「你已經咁鬼靚,就算佢拉低少少個Curve都係靚!」阿嬌繼續搞笑:「我擔心吖嘛,唔使整容慳番好多,你知唔知?」

戀愛大過天

至於阿Sa一心只想追求平凡的愛情,有感在這行經常拍戲、拍MV、拍廣告,好多故事都好戲劇性,所謂戲如人生,但她說:「我嘅人生唔係好想咁戲劇化,想正常,平凡唔等於平淡,我想平凡啲。」阿Sa更直認是戀愛大過天的女仔,很喜歡黐住男友,她完全不掩飾說:「我直頭會好容易冇咗自己,不過我依家學識咗愛自己多啲。」阿嬌表示戀愛時都會迷失自己,知道是不應該,故要努力學習,希望另一半夠風趣,可以每日令她笑一笑。

阿Sa愛閨房「攤屍」

合作多年,Twins從未有過拗撬,她們異口同聲指因為「懶」,阿嬌笑說:「有咩好拗呢?」阿Sa說:「日日見住,如果拗唔知點收科。」她承認細個入行時兩人試過冷戰,因為當時並不熟落,又不知對方想法,阿嬌說:「本身我唔係好識講嘢,好容易講錯嘢,誤導咗成件事,咁我寧願唔講。」Twins已經長大成人,回想以前好多事情都感迷茫,阿Sa說:「可能自己未有能力去解決一啲嘢,亦都冇能力去幫對方解決問題,好多時要靠公司指引,即使唔係太喜歡都要硬住頭皮去做,但依家會有智慧去解決問題。」阿嬌指過去增值不少,如今擁有自主權,雖然忙都忙得開心,心態也覺得舒服。

搶住放假

Twins兩個大忙人由年頭忙到年尾,卻自嘲是「懶到出汁嘅人」,阿Sa笑言可以在家中「攤屍」唔郁,阿嬌更試過懶到演唱會後不卸妝就大覺瞓,要勞煩好姊妹阿Sa親自為她卸妝,阿Sa說:「我係咁捽佢,佢都唔醒呀!」由於她們的工作時間表排到滿瀉,兩人見到有一、兩日「吉日」就即向公司hold定假,她們笑說:「好似大家鬥搶啲期,呢個又搶我啲期,嗰個又搶,我依家要自己搶番自己啲期。」

後記:午夜凶鈴

阿Sa曾經被經理人霍汶希(Mani)封她做「午夜凶鈴」,因為以前性格比較火爆的她最愛半夜打電話畀Mani,阿嬌自爆都試過,但反被Mani鬧爆:「你可唔可以唔好再咁夜打電話嚟!」阿Sa聽罷即教精阿嬌:「你惡過佢吖嘛!」阿嬌即笑言不敢!非常爆笑。

阿Sa

髮型:KateShek@Hair Culture

化妝:Yannes lee@ndnco.co

服裝:Jacquemus@ithk

阿嬌

髮型:Keith_wong

化妝:Circle Cheung@ndnco.co

服裝:Earring from J.Crew / Floral jacket from Moussy

場地:The Luxe Manor帝樂文娜公館

文:音樂組

攝:張福宏