袁嘉敏急住相睇 望打爛Dry缽

藝人袁嘉敏(Candy)於性感冶艷的外表下,原來擁有一顆寂寞的心,她經常被誤會身邊不乏追求者,事實卻愛情運欠佳,急得她要參加相睇活動,惜相睇對象均未合眼緣,有一位甚至比她年長二十歲,而且不是單身,令恨拍拖的Candy卻步!

外形姣好的袁嘉敏,原來桃花運一般,連她亦大惑不解:「大家對我好大誤會,今年想快啲(拍拖),成日好失望,情人節有去相睇,其實一直有去吓相睇當識朋友,但唔啱,有個大我二十年,我想生小朋友,小朋友讀完幼稚園,佢已經六十歲!」最令Candy卻步的是對方原來並非單身:「好複雜呀成件事,其實我好簡單,覺得佢有複雜關係就唔好啦!」

分手大龍鳳

Candy又慨嘆上一段關係同樣令她傷心收場:「同外籍男友拍咗拖四個月,之後拖拖拉拉,我計佢七個月啦,後尾分開佢又返嚟搵我,搞咗場好大嘅龍鳳,我發咗場脾氣,叫佢唔好再返嚟浪費我時間!」Candy指對方很奇怪,分手後,他回港仍會約她食飯。

剛開始時,Candy很想珍惜這段關係,皆因試過六年「守齋」的歲月:「喺佢之前我六年冇拍拖,所以有拖拍好珍惜,希望可以長久啲,為咗佢,我性感床戲都推埋,就係唔想佢唔開心。」

不過久而久之,Candy發現不停遷就一個人原來很辛苦:「本身想留番佢做朋友,始終段關係又唔係好親密,都係行吓街、食吓飯,可以做番朋友,但都係算。」問是否被對方嫌不夠「親密」?她說:「我唔想去諗,佢太唔鍾意我呢行工作,少少暴露都唔鍾意,我想搵個簡單嘅人就算。」

文:李惠儀

攝:劉斌

場地:K.H.WorkHouse@Tai Ping Shan Street Gallery