上月與老公Daniel到美國低調結婚榮升章太的王君馨，昨日在香港補辦舞會婚宴，婚禮安排花盡心思，一班「處女黨」成員岑麗香、苟芸慧等化身索爆姊妹團助陣。一對新人情到濃時化身「接吻魚」咀個不停，二人因遠距離戀愛做了多年「牛郎織女」，君馨冧爆宣布老公已準備好來港與她雙宿雙棲：「佢為咗我放棄晒一切！」

藝人王君馨（Grace）與老公Daniel經歷11年愛情長跑，上月11日在美國紐約註冊結婚榮升「章太」，昨日二人在大潭美國會補辦香港婚宴，岑麗香、苟芸慧、裕美等七位好姊妹及三位兄弟助陣，鍾嘉欣則擔任伴娘，與300多位賓客分享喜悅。個性洋化的Grace與Daniel以舞會主題搞新式婚宴，據知在該處搞婚禮最低消費25萬元，以自助餐形式計每位賓客約千元，加上場地布置、回禮禮物以及雞尾酒款待賓客，豪花百萬搞婚禮。

新娘子Grace先以封胸魚尾裙婚紗、戴上閃爆鑽戒與老公見傳媒，Daniel主動抱實Grace並咀面珠兩次，她即回禮咀老公兩次合計達十秒，又貼心幫老公抹嘴，穿上高衩裙的她步下長樓梯時不慎春光乍洩，之後二人再應要求咀嘴，化身「接吻魚」！

為保護怕醜老公仔，Grace獨自受訪時表示老公因不諳廣東話，事前已教定「四式」：「老公知有傳媒好緊張，教咗佢四樣嘢，就係Hello、派利是、鞠躬、再講唔該就得啦！覺得佢表現好好，啲朋友笑佢唔笑時就好似黑面。」Grace又預告為老公準備了驚喜，不怕他流男兒淚。講到手上的鑽戒，Grace大賣關子說「唔知價」：「問咗老公好多次都唔肯講，對我嚟講係無價嘅。（準備好造人？）計劃兩三年後，先過吓二人世界。」她更開心表示老公會轉來香港發展：「佢已經搵到工作，為咗我放棄晒一切！7．11係我哋拍拖12周年紀念，特登揀今日，好有紀念價值！（搞婚禮有冇感動嘢？）日日對住老公我已經好感動，之前分隔兩地、大家睇住個Mon，可以近距離接觸已經好滿足。」

Grace再換上紐約婚禮時的低胸婚紗亮相酒會，在進場儀式時邊唱二人的主題曲《From this moment》邊步入會場，令Daniel又驚又喜。行禮後，新人轉往室外在面臨海景下進行切餅儀式，Grace自爆緊張又感動：「估唔到自己個婚禮會咁感動，酒會進場我就喊，仲唱咗首歌送驚喜畀老公，佢完全估唔到我會咁做，仲問我做乜揸住支咪。（佢有冇送上驚喜？）佢今晚會有驚喜畀我嘅！」她又透露講誓言儀式時感動到喊：「我寫畀老公嘅係話無論他朝我再遇到比佢更好、更適合、更靚仔嘅，我都一定會揀番佢，老公就話好期待同我一齊生活。平時老公好少講嘢，今日說話特別多，佢話王君馨呢十年嘅成就，身邊有好多人幫過我，要多謝大家。」

而岑麗香（香香）指新郎Daniel個性文靜，與Grace好襯，至於其夫強強未能出席，由她做代表，更送了性感睡衣為禮，問到是否催新人早日生仔？香香說：「我冇咁講呀！畀佢哋試吓囉，之前結婚都有朋友送性感睡衣畀我，咁我又送番件畀君馨囉！」婚禮後，一對新人即拉隊與裕美及多名圈外友人，前往銅鑼灣的日本餐廳醫肚。

文：影視組