周柏豪千萬過檔：見位就坐啦！

春風滿臉的柏豪出席加盟記者會，獲星夢CEO何哲圖（Herman）在台上親口封他為「星夢一哥」，並說要捧他做香港「藝壇巨星」。至於無綫副總經理（節目及製作）杜之克及助理總經理（非戲劇製作）余詠珊先後上台送上閃爆賀禮祝柏豪「發光發熱」。問到被叫「星夢一哥」感覺如何？柏豪即說：「我屋企排第二，我有個哥哥嘅。（工作係嘛！）咩都好啦，好開心，呢一兩年自己發生好多大事，今日仲緊張過結婚。」

人工高福利好

講到杜之克表示早於去年他和黃翠如拍《愛情來的時候2》就開始斟他加盟，柏豪說：「都係，因為大家理念一致，仲係人工高、福利好。（簽約價好高？）幾驚訝o架！」柏豪承認三年合約有8位數酬勞：「TVB NEW MEDIA係Management（經理人合約），歌手約係簽星夢，再加種星堂係三個伯樂。（邊個有最大話事權？）其實大家一齊陪我出發，實現我嘅夢想。」

周柏豪正式加盟「TVB NEW MEDIA及星夢娛樂」，連「大明猩」都嚟撐場！	何哲圖封周柏豪做「星夢一哥」。	男友鄭俊弘地位被搶，何雁詩都有畀面傳短訊給柏豪。

想唱洗腦歌

柏豪又透露：「嚟緊會唱《使徒行者2》主題曲，好開心。（想有首洗腦歌？）每個歌手都想有首令人耳熟能詳嘅歌。」問可想攞「最受歡迎男歌星」獎？柏豪坦言：「咩獎都想攞！（咁攞埋視帝啦？）所有有機會嘅都想攞，都有好多朋友恭喜我，何雁詩都有傳短訊畀我。（你坐咗佢男友鄭俊弘嘅一哥位呀？）冇分o架！大家年輕人，見到位就坐啦……冇分o架！（Herman分咗喎？）儀式啫！（唔怪得許廷鏗要走啦？）咁啱大家都係Good Timing搵到大家嘅合作夥伴。」

文：音樂組

攝：張福宏