佗B開工嘔到七彩 賴慰玲搵雪雪對親家
懷有五個月身孕的藝人賴慰玲昨日出席活動，手腳仍纖瘦的她，側身才見到凸肚，她笑言會考慮跟同是大肚的孫慧雪對親家，又說不急於與男友結婚，考慮年底生BB後才計劃婚禮。
無綫藝人賴慰玲前日在網上宣布懷孕，獲網友「噴射式恭喜」，昨日她與張致恒出席滑浪活動，穿上平底波鞋及牛仔褲，手腳仍纖瘦，側身始見到肚皮凸出。她透露尚有幾日就懷孕五個月，預產期12月初，現時體重重了十磅，最近很怕洗衣粉及生嘢食的味道，晚上會嘔吐大作：「通常11點就嘔，所以盡量早啲瞓，嘔過五、六次，辛苦到標眼水。」
享受做女王
賴慰玲直言舞台劇演員男友梁子峰近月對她特別好，為她細心下廚，笑言要享受做女王的感覺！講到結婚計劃，她說：「有冇小朋友都諗住嫁畀佢，唔爭在幾個月，等到7月底拍完劇再計劃，所以應該唔係今年搞。」她已知BB性別，為保持神秘感，暫不公開。講到好友孫慧雪懷孕八個月，賴慰玲笑言考慮跟她對親家，至於一眾姊妹如陳嘉寶、蔡思貝、陳凱琳、陳瀅等爭做契媽，笑言BB將有六、七個契媽：「畀晒佢哋做！但每人要送一隻金碗！」原本她會擔任化妝品牌代言人，因有物質不適合孕婦使用，忍痛推Job損失六位數字。
劇組錫住
近期賴慰玲拍劇集《棟仁的時光》，已跟監製溝通好，工作人員都很錫住她，高層曾勵珍更致電關心其近況，令她感動到眼濕。劇集拍檔黃長興亦戥她開心，他說：「佢都有問我老婆關於BB嘅嘢，又問吓搵咩醫生！」而《棟》劇監製葉鎮輝表示與賴慰玲有共識：「佢開工前已講咗（有喜），角色上唔多動作，主要文戲多，影響唔大。」此外，黃山怡（糖妹）昨日在活動中戥好友佗B開心，問到一班M Club女爭做契媽？糖妹笑言：「BB好幸福，萬千寵愛。」雖然賴慰玲婚期未定，但她樂於隨時做伴娘。
文：影視組