荷里活男星賓艾佛力前日被影到跟女監製Lindsay 甜蜜撐枱腳，用手輕撫女方玉背，是賓佬前年宣布同珍妮花嘉娜分開後，感情首次有着落！
44歲的「賓佬」賓艾佛力（Ben Affleck）於2015年宣布同45歲女星老婆珍妮花嘉娜（Jennifer Garner）結束11年婚姻，並於今年4月正式入紙離婚，現時終於撻着新女，對方正是《周末直播》（Saturday Night Live）女監製Lindsay Shookus！
賓佬同Lindsay前日被影到在洛杉磯撐枱腳過二人世界，眼見記者影相仍表現大方，賓佬仲好有風度，未有即時彈開，反而用手輕撫女方玉背，似是有意公開戀情。有消息人士爆料說：「賓佬同Lindsay感情仍處起步階段，好享受相處時光，已經約會咗數次，唔係一時興起撻着，佢哋好關心對方，想慢慢發展。」Lindsay上星期更飛到倫敦只為跟賓佬約會，一齊睇名導森曼達斯（Sam Mendes）的舞台劇《The Ferryman》。
雖然賓佬已同珍妮花分開，但二人仍保持友好關係，日前先合體參加慶祝美國國慶遊行，二人育有三名子女：11歲Violet、8歲Seraphina及5歲Samuel。
文：外娛組