裕美蝕底VS君馨寸底友情大爆發

王：王君馨

裕：裕美

「阿憎」對「阿樂」

雖然裕美曾一度陷入低潮，但本質是開心果的她好快便因樂天性格而收拾心情，更常為小事笑逐顏開；而大情大性的君馨就自爆是「寸底人士」，性格似足《玩轉腦朋友》（Inside Out）角色「阿憎」。

王：我根本就係一隻「阿憎」，係個好寸嘅人同時又好有正義感，好憎啲人恰啲好弱嘅人，睇到嘅話「阿憎」就會出嚟！但係阿美佢好「阿樂」，有時對住佢會冇晒符，例如佢煮飯畀我食，問我覺得點，我話還好，可以進步吓，但佢竟然話冇問題！一般人一定會諗我已經煮畀你食，仲喺度咿咿哦哦，嘈喧巴閉！佢份人好開心、好簡單。

裕：其實君馨話我都係想我好，我覺得佢講得誠實，係好朋友先會咁誠實。

王：有時我都會話佢太天真、太傻，會開名鬧：和田裕美，你做緊啲乜嘢呀？你知唔知咁樣做好蝕底，好蠢o架！其實唔係鬧嘅，只係佢會好易信人，我哋都大個喇，係咪應該用理性去處理問題？

裕：佢會問我係咪喺呢個地球生存，我喺邊度嚟？

放大圖片	黃子恆	君馨性格強悍獨立；裕美則柔弱伊人，沒想到兩人卻一拍即合互補不足。

「竹升妹」對「本地薑」

君馨2007年參選港姐並奪得亞軍後，在美國長大的她便毅然來港發展事業，盡顯獨立本色，最近更憑精湛演技獲得觀眾讚賞；而裕美雖然是中日混血兒，大部分時間在香港度過，看似有家人可以依賴，但事實上又是否如此？

王：我喺美國長大，要逼自己獨立，雖然係一條街，但五歲時已經自己一個人行返學校。好多嘢都覺得要自己掌管同控制，我想Join咩Club、想放學去公園玩、想識咩朋友、想去玩樂器定練畫畫？喺美國想做乜就會去做。

王君馨經過11年愛情長跑終成為幸福人妻。	兩人因合作劇集《心理追兇》而成為好姊妹。	裕美感激君馨在低潮期給予鼓勵及支持。

裕：雖然我好依賴人，但係我媽媽都好需要我去照顧，細細個已經要Take Care佢。我媽媽好似個小朋友咁，成日十一、二點走去食快餐，我會即刻鬧佢。但係對住君馨，我又會變番小鳥依人，我覺得人哋開心，我就開心。

王：其實係因為佢擺媽媽喺第一位，佢冇主見都係因為佢將自己嘅主見掉走晒。所以我同佢相處嗰段時間，我都成日叫佢唔好就我，要諗自己想點。當我面對佢呢類咁無私嘅性格，我會好想照顧佢，我都會將自己想要嘅嘢擺低，問佢想要啲咩，但最後發現其實佢好多方面都好照顧我。

「幸福女人」對「悲劇主角」

裕美早前辦理離婚手續，同時得到黃子恆的細心關懷，可惜在錯誤的時間遇上，傷上加傷，講起經歷裕美更忍不住流下淚水；而君馨則經過11年愛情長跑後拉埋天窗，提起對方時更由崇尚理性的現代女人頓時變成小鳥依人。

裕：其實件事爆出嚟嗰吓，我成日都喊，但好快兩三個月之後我就企番起身。如果唔係上帝，我都應該冇可能企番起身，又好好彩我同君馨一齊生活，最緊要嘅係佢時刻陪住我。當時我好憎自己，其實不嬲都唔鍾意自己，有人愛我，我就覺得好難得。君馨令我知道，我係有價值嘅，令我知道我嘅肯定唔係來自男朋友或者任何一個人。

王：最初係諗住佢需要就可以嚟住，冇諗過最後係互相扶持。啱啱接佢嚟時，佢好破碎，慢慢我同佢分析個情況，叫佢去面對。到佢搬走時，我都真係有少少唔捨得，唔知係唔係唔捨得佢煮嘅飯。不過我都了解咗自己好多，原來我好強，但係我唔需要咁強，喺佢身上我學識到遷就人，可能我太理性，好想說服人去做一件事，但阿美佢係會做一樣嘢，去等大家開心，唔會有啱同錯。

「值得等」對「錯的人」

記者：你同黃子恆仲有冇聯絡？

裕：同子恆冇特別聯絡或者斷咗聯絡，大時大節都會恭喜佢，但係同佢冇發展可能喇，而我第時識伴侶都要經君馨睇睇。

王：唔係話子恆唔好，只不過係佢哋相遇喺一個唔應該嘅時間，我諗美美依家係等待緊。

裕：好嘢係需要等待嘅。

王：我嗰個好值得等，好相信阿美都會有！

文：影視組

攝：劉斌

服裝提供（王君馨）：Moussy、NoveltyLane、（裕美）：Amelire street

首飾提供（王君馨）：SLY（Moussy）、Dearest Grace