梁藝齡冇戲癮無意復出

近年淡出娛樂圈的藝人梁藝齡，昨日到調景嶺明愛白英奇專業學校出席「生命禮讚分享會」活動，前輩胡楓見到她即熱情送抱，又摸她面珠，場面有趣！問藝齡現時有否戲癮？她說：「驚自己應付唔嚟，前幾年有拍過福音電影，覺得自己唔識做戲，放低太耐。（有冇人搵你復出？）冇呀，我都唔想。」51歲的她保養得宜，問到有何心得分享？她說：「冇o架！盡量11點前瞓覺，我依家返朝九晚五，可以早啲瞓，仲有飲多啲水，做啲女仔都做嘅皮膚護理。」不過她透露近年患有僵直性脊椎炎，要keep住食藥，平日彎腰會感疼痛，亦不能穿高跟鞋。至於胡楓透露將參演劇集《再創世紀》，問是否飾演富翁？他笑說：「梗係啦！睇我個樣都似有錢佬啦！雖然我其實冇錢。」