性格凹凸互補 王賢誌同性婚姻甜蜜蜜：依家光明正大
王賢誌（Vinci）擁有多個身份：藝人、商人、東華三院第一副主席等，但最為人所共知的莫過於他去年與同性男友Kevin結婚，是圈中首位公開男同志結婚的藝人，大膽的舉動，可見兩人相愛極深。二人結婚快將一周年，Vinci罕有分享他與Kevin由相識到婚後的點滴，透露兩人一凹一凸的性格造就他們更合拍！他又表示婚後心情放鬆不少：「我依家光明正大，有家室。」
Vinci與Kevin一起8年，去年8月於加拿大簽下婚書，回想當初相識，Vinci透露當時處於人生的空虛期，他說：「嗰時事業上有轉變，離開無綫，有不愉快事件，又多輿論壓力，人又三十歲尾，未拍過拖，好多嘢加加埋埋，又覺得要識番多啲朋友，跟住去蒲、去玩，嗰時都好瘋狂，可以蒲到好夜，打烊先返屋企，但好享受飲酒後，醉與未醉之間個感覺，覺得好開心，嗰時覺得如果呢刻唔去蒲，呢世就唔使再蒲，但呢個階段已過咗，依家好正常。」
改善少爺脾氣
至於與Kevin是否因蒲而識？他透露Kevin是他朋友的朋友，本身是澳門人剛到香港玩，巧合地遇到，之後去酒吧，他說：「我哋嗰晚已經糖黐豆，大家對大家都『着咗』，之後再約出嚟就好快開始咗，佢由澳門搬咗嚟香港住。」二人相處後，發現大家性格截然不同，問到Kevin是否令他改變？Vinci說：「徹底改變咗，以前我有少爺脾氣，要人遷就我。我個人好執着，要求好高，屋企啲嘢要好整齊，由細到大如果啲嘢不如我意，我會瞓唔着覺，呢樣唔係煩到人，係煩到自己。同佢一齊之後發覺唔可以要求有同你一樣嘅人，咁你就要降低要求，或提高佢要求，佢唔執嘢周圍放，我咪執埋佢嗰份。」
Vinci直言Kevin首先吸引他的是英俊外形、性格好和有愛心：「佢有興趣嘅嘢會好用心去鑽研，做到最叻為止，呢樣我好欣賞。同埋佢煮嘢好叻，我完全唔識煮，原來有個識煮嘢嘅人，令你生活多咗好多樂趣。佢好鍾意種嘢，以前間屋唔會有植物，依家變咗花園咁。生活起來大家性格好唔同，長短互補，對住同你一樣性格嘅人咪好悶，我已咁執着，如果對方又係，咁死得。」
唔再瘋狂Message
二人相處8年不但沒鬧過分手，激烈嗌交亦甚少，他說：「有過一兩次比較激烈嗌交，後來大家講咗有咩唔啱要攞出嚟講，唔好放喺心。結婚之後更少嗌交，依家踏入另一階段，隨着環境、年齡影響而改變，睇得輕鬆咗，以前好緊張佢，一日send好多message畀佢，依家唔會太煩，大家知大家做緊咩就得。」問到為何有衝動結婚？他說：「其實拍拖頭一兩年已諗過，但香港做唔到，直至去年家人去加拿大坐郵輪，咁我哋未去過，又想去，我突然同佢講咁不如結婚囉，就咁就結婚。」
開公司搵贊助
Vinci由電台、電視、司儀和主持都做過，10年前因與無綫鬧不快而離開幕前，最近又再活躍公仔箱，早前客串主持《歎得很健康》，之後又客串拍劇集《溏心風暴3》，他說：「十幾年冇拍劇，雖然客串唔係好多戲，但角色好重要同好多對白，都有啲壓力。」
除了打理家族生意，Vinci最近又成立了公司，主力搞演唱會和電影。問到投資金額，他認為時間與人脈都是投資一部分，不一定要真金白銀：「7月已經有3場以Band Sound為主嘅演唱會，由唔同年代嘅Band組合埋一齊，我就負責搵Sponsor。（搵贊助要低聲下氣？）好彩我喺工作同東華識唔少朋友，以往無數人搵我訂演唱會飛，依家自己搞演唱會冇理由唔支持啩。」
Keep知名度做主席事半功倍
離開幕前後，Vinci主力家族生意，又投放了不少時間在慈善工作，他說：「呢5、6年多數做東華工作，下年就會做主席，今年好多時間都係計劃出年嘅嘢，基本上主席嘅時間表係畀唔同部門嘅同事mark。喺東華呢幾年，學到好多以前冇接觸嘅嘢，又識咗好多人，知道社會有需要幫助嘅人好多。今年做多啲幕前工作，都想Keep高啲知名度，令自己做主席時可事半功倍。」家族生意是否沒時間打理？他說：「做健康食品都算係家族生意，爹哋本身做緊嘅我就真係冇時間踩隻腳埋去。」
尷尬時刻 訃聞點稱呼Kevin？
Vinci雖不介意別人知道他是同性戀者，但不否認期間有不少難關，特別是如何面對家人、別人的目光，他說：「同父母講要令佢知我係咩人，開頭有啲難，佢哋聽完雖然冇表現得好唔開心，但都會懷疑係咪冇得改。到後來我兩個妹結婚，我都仲係一個人，拖都未拍過，佢哋開始緊張，以後有冇人同我生活，佢哋嘅緩衝期好長，長到佢哋完全接受晒。（有冇鍾意過女仔？）冇，從來冇同女仔或男仔拍拖，但你會知嗰個感覺。」
公開同性婚姻，Vinci幸運地沒受到別人的白眼：「好好彩，可能依家啲人文明咗，試過喺街為東華賣旗，啲人見到我，佢哋過嚟恭喜我，好多謝佢哋，但如果真有人反對，我亦明白點解要反對。不過公開後心情放鬆咗好多，我依家光明正大，有家室。」婚後生活與拍拖時並沒兩樣，直至去年聖誕外婆過身，Kevin的身份令他不知所措，他說：「講起尷尬又奇怪，婆婆過身要出訃聞，正常我嗰欄就寫外孫，咁Kevin叫咩呢？佢又唔係外孫婿，又唔係外孫媳，好(r)頭，我都問過啲人，但未有先例，無正確答案，最後冇放佢名落訃聞，但現場花圈就有放佢名。」
文：名人組
攝：黎志輝
髮型：Alamin@Hair Culture
場地：王家沙花樣年華