緋聞男女當街衝突 林作被Carman狠插：用下體諗嘢！
瓣數多多的林作與「十優港姐」麥明詩分手後，與本地跳唱組合Bingo隊長Carman（關嘉敏）傳緋聞，成為其心中的女神，不過，日前二人被影到在街頭鬧交，Carman一手推開林作，更起腳踢林作，嬲爆說：「點解你成日用下體諗嘢！」
林作工作涉獵範圍甚廣，有大律師唔做，殺入娛樂圈，又做補習天王及舉辦識朋友的活動，雖然瓣數多，但感情仍未有着落，自與麥明詩分手後，對舊愛的事幾乎隻字不談。早前爆出他轉冧本地跳唱組合Bingo隊長Carman（關嘉敏），成為其新任女神，又對Carman有讚冇彈而爆出緋聞。
二人日前現身半山，見Carman嬲爆爆對林作手指指，更爆出一句：「點解你成日用下體諗嘢！」繼而用手推林作的胸，令他稍為跌一跌，之後更起腳踢向林作下體，但林作未見痛苦表情，無嬲之餘仲笑笑口，一臉受落，原來Carman只是作狀踢，沒有傷到他。
扮死魚「典」出笑彈
其實林作進軍娛樂圈後，諧星形象深入民心，獲不少廣告商青睞，最近他為品牌拍宣傳片，與Carman飾演情侶在街上鬧交，「衝突」當日二人正是不斷試戲及試位。雖然Carman十分入戲，但林作不時搞笑要重拍，令Carman反反覆覆重拍推他的場口，不過就算推得多大力，林作都笑笑口，似乎因難得與女神合作，林作想製造更多「身體接觸」機會而不停NG。另外，林作最近不時拍片放上社交平台，大騷搞笑演技，更將自己與Carman的緋聞擺上枱，扮對方有男友而自己受打擊，在家中廚房的工作枱上扮「死魚」左典右典，場面搞笑，連網民都十分欣賞，更留言：「點會溝唔到女！」
文：名人組