Karina似足老竇阿哥 謝安琪餵足一年人奶推Job做乳牛
謝安琪（Kay）與老公張繼聰今年3月成功追女，昨晚是她產後首度現身，為愛女張靖豪搞百日宴！成功收身的她未受銀彈利誘復出，笑言要做「大埔乳牛」餵足一年人奶！
圈中模範夫婦謝安琪與張繼聰10年前誕下兒子張瞻，阿聰多年來都想追多個女，至今年3月，Kay終於為他誕下小公主張靖（Karina），湊成「好」字，而張靖跟阿聰和哥哥張瞻似足餅印！錫女錫到燶的阿聰近年事業起飛，吸金力大增，不惜豪使一大筆為張靖大搞百日宴，昨晚在主題樂園的酒店筵開24席慶祝，宴會以自助餐形式舉行。
Kay與阿聰於晚上約8時接受傳媒訪問，穿白色喱士裙的Kay是產後首次公開見人，見其收身成績不錯，上圍依然豐滿，有2、3吋深的事業線！兩人感激記者及300名賓客到賀，而阿聰特別感謝太太：「自己一直忙住工作，今日所有策劃、設計都係老婆同Planner諗，主題係嘉年華，希望大家玩得開開心心，入面好似遊樂場咁！」問到是次花費多少？他說：「有時好多錢都買唔到啲嘢，好似今次都有好多朋友幫手。」
靠老公鞭策操弗
記者讚Kay收身收得快，她表示有做運動，包括舉重及舉啞鈴等，坦言是受身形健碩的阿聰影響：「身邊有人鞭策，自己唔可以太遲起步！（想操到有馬甲線？）呢條線離我頗遠。（你有事業線咪得囉！）哈哈，我嘅事業已經擺埋一邊，為咗家庭都犧牲好多。」問到何時復出？她坦言暫時未有打算，但承認有品牌邀請出席活動，惟她已拒絕：「依家想將啲時間放喺小朋友度，以家庭為先，囡囡都係得幾個月。雖然囝囝10歲，但都係要傾偈嘅階段。（見財化水？）損失有一定數字，不過我唔會咁算帳，只要睇住小朋友開心就乜都值得！」
阿聰諗計護花
問到兒子張瞻可有呷妹妹醋？Kay說：「冇，反而佢成日都錫妹妹，可能同妹妹年紀差好遠。佢依家放暑假，換尿片時佢仲幫手掉嘢，餵人奶時又幫手冚住。（仲餵緊人奶？）係呀，希望可以餵多一年。」她更笑言要做「大埔乳牛」！阿聰則笑言已開始盤算在女兒讀中學及大學時先發制人：「起碼哥哥第一日接放學，第二日到我接力，我要操到好似三哥（苗僑偉）咁Fit，走出嚟接個女放學！」問到可有為Karina成立基金？Kay透露已有一套完善計劃，阿聰就希望囡囡自由發展，學習固然重要，但心靈富足才是最緊要。
昨晚不少圈中藝人都有出席Karina的百日宴，當中方力申透露已用「張靖」名義在內地捐建水窖作為禮物，鄭欣宜則透露送了BB服飾：「我見到小朋友啲衫褲就忍唔住買，唔捨得買畀自己，都捨得買畀小朋友！」至於陳瀅與劉佩玥（Moon）齊齊受訪，陳瀅自爆之前Moon曾陪她到此處散心，並在現場的一條長樓梯合照，問到當時是否因情傷而不開心？她說：「唔好講到咁真。」默認年前與賭王四房之子何猷亨分手一事。
文：音樂組