家暴？顏卓靈爆白只「蛋蛋」！
導演翁子光雖然與女友何佩瑜情海翻波，但由他帶進電影世界拍《踏血尋梅》的白只卻與女友顏卓靈（Cherry）打得火熱，這對情侶前晚出席電影《今晚打喪屍》群星首映禮時，更大晒另類恩愛。
「係咪好痛？」
Cherry在遊戲中大大力借用男友額頭打裂熟雞蛋殼，清脆的「啪」一聲令全場戥白只慘豬。提到毫不錫住男友，Cherry即指不想男友捱扑多次：「長痛不如短痛，但真係好大聲！你係咪好痛？」白只說：「唔痛！（好冧？）又未去到咁自虐！」問平時有否打男友？她即笑說大家似問有否家暴，而白只則補充說：「大家都係斯文人。」
提到張繼聰與Cherry有攬攬戲，白只稱不會呷醋：「但張繼聰攬我，佢（Cherry）又會呷醋！我哋好複雜，我同張繼聰千絲萬縷！阿姐（謝安琪）都會呷我醋！」至於曾國祥亦有前來支持女友王敏奕，更笑謂終於睇到女友的婚紗Look。
