鄭雨盛型接機會露股冇所謂
韓國型男鄭雨盛昨午抵港，出席晚上的腕錶活動。穿便服的他甫出機場即友善揮手，還刻意除下太陽眼鏡任影唔嬲。晚上他則為歐米茄展覽會擔任開幕嘉賓，穿上西裝的他官仔骨骨登場，迷倒現場不少女士，紛紛拿出手機爭相與他合照。
結婚拖住先
鄭雨盛透露最近忙於拍攝電影《鋼鐵雨》，需要減肥，問到用甚麼方法瘦身？他說：「運動係最有效嘅方法。（會唔會節食？）均衡飲食最重要，但好耐冇嚟香港，梗係要食多啲，啱啱先去咗食點心。（最滿意身形邊個部位？）冇話滿意邊part，但會做多啲運動去改善自己唔滿意嘅地方。（會唔會喺電影入面騷肌或露股？）唔會特登，但如果角色需要都會，因為我係一個演員。」再問他有否想過成家立室？鄭雨盛說：「其實自己都唔後生，但首先要有時間，依家都有工作喺身，要少少時間去準備。」
周汶錡謝絕收禮
同場還有名模周汶錡，提到大仔下月3日生日，問到會否送一些特別的禮物給囝囝？她說：「多數朋友送，因為佢屬羊，所以都係關於羊嘅禮物。我就唔會買畀佢，因為實在太多玩具，當然會循環再用畀細仔玩，但太多玩唔晒，各位唔好送禮喇，謝絕收禮。」
而太子珠寶鐘錶主席鄧鉅明被問有否看過鄭雨盛的作品？他說：「韓劇我少睇，因為掛住賣錶，同埋睇到啲韓星咁靚仔，有啲自卑感。」問到若有機會，會否坐太空船上太空？他笑言：「我唔會，第一我怕死，第二又好貴，我又孤寒，留番啲錢買嘢畀老婆好過。」
文：名人組