江美儀扮靚拒搵命博
藝人江美儀及已轉職藥廠工作的韓君婷，昨日到九龍站出席活動，江美儀說：「我之前有用機器收緊面部皮膚，韓君婷問我有冇興趣試佢公司產品，試咗後，啲人話我塊面瘦咗！（另一半有冇讚？）使鬼佢講咩，全世界都知我靚咗！（會為貪靚去冒生命危險？）我唔係咁嘅人，唔好開刀同整嘢入身體度，因為我係演員，唔係明星，連最普通嘅割雙眼皮、紋眼線都唔做！」
韓君婷則說：「我哋公司搞緊『尋找黃金比例』活動，希望搵到最能代表香港人嘅五官，勝出者會代表香港去泰國同其他亞洲地區嘅黃金比例五官比高低。（有留意港姐面試出現間尺鼻、佛地魔？）有，呢個都係風氣、趨勢，亞洲人嘅鼻冇咁高同挺，可能受童年所睇漫畫影響，想追求高同挺嘅鼻，但就算整都要適可而止，同搵深資歷嘅醫生幫手。」