連詩雅送祝福：梗係襯！

現年34歲的蔡卓妍（阿Sa）前年與陳偉霆分手，之後一直單身，昨日有指她與連詩雅前度、家族資產過百億的闊少石恆聰（Anthony）拍拖，阿Sa回覆本報時未有否認戀情：「依家好開心，多謝大家關心，其他唔講咁多。」至於今日29歲生日的連詩雅慘被拖落水，被指未肯放手，望與舊愛再續前緣。適逢連詩雅、馬天佑和林作等昨晚出席手機發布會，Shiga坦言有看報道，強調與石恆聰已分開好耐，現時是少聯絡的朋友。

生日盼有艷遇

對於有指仍纏住男方？Shiga說：「得啖笑，大家冇聯絡好耐，唔係事實我唔回應。（佢拍拖會唔會祝福佢？）梗係會啦，話晒認識咗咁多年。（有傳因你同男仔玩得好埋而分手？）呢啲純粹虛構，識我都知我係咩人，都覺得好搞笑。（佢同阿Sa襯唔襯？）靚仔靚女，梗係襯！（私下有祝福？）遲啲啦。」並表示生日願望是希望有艷遇，又笑言朋友讚她是筍盤。提到唱片公司入稟控告其經理人公司，她表示一切會交給公司處理，心情未有受影響。

連詩雅透露跟舊愛石恆聰已分開一段時間。	連詩雅與石恆聰曾被拍到夜蒲後返男方的寓所。	馬天佑

同場的馬天佑被指是紅娘撮合阿Sa與石恆聰，他直言：「冇咁嘅事，只係食吓飯，自己唔會做呢啲嘢，唔會刻意去做。（阿Sa開心好多？）朋友開心好重要，我當朋友係屋企人，阿Sa都好開心。（兩人係咪好襯，男才女貌？）咁老套，開心最重要。」

馬天佑讚好女仔

問到阿Sa是否正在拍拖？馬天佑則着大家問當事人。再問阿Sa和男方有否一齊食飯睇戲？他又突然說沒有，有點前言不對後語。馬天佑大讚阿Sa是好女仔，值得開心幸福，又讚Anthony好好人，與他自細認識，與Anthony妹妹是好朋友。至於林作則表示用自拍來溝女確實是高招，更自爆在活動上見到一位模特兒，正想用這招溝女。

文：名人組