陳琪篤爆囡囡秘密被炸型
藝人胡諾言與太太陳琪的大女胡芷苓（Jay Jay）可愛活潑，知道爸爸做舞台劇亦要撐場，但就被陳琪大爆她雖然參與合唱團，但冇唱歌天分，Jay Jay即撒嬌說：「唔好講秘密出嚟啦！」十分可愛！
胡諾言（胡仔）與太太陳琪及囡囡Jay Jay、可嵐、胡楓、國藝經理人公司老闆冼國林與旗下藝人阮頌揚及葉芷如等，昨日出席「衍生中醫兒童健康中心」開幕禮，胡仔表示因為大女考完試又放假，故特意帶她到場，更透露女兒讀傳統學校，將升讀三年級，早前兩公婆停工為女兒溫習，陳琪說：「有啲家長會唔認同，考試嗰陣我仲帶佢去游水，畀佢跑跑跳跳，唔可以廿四小時都溫書。」
關心爸爸傷勢
陳琪更大爆老公舞台劇首日演出沒有帶同囡囡去支持，令老公感失望：「阿女都想去，但我覺得要睇到晚上11點，好夜，點知老公就問阿女喺邊，第二日先帶佢去，我唔了解佢哋兩父女。」胡仔指女兒是超級VIP，更自爆演出時因劇情需要用煙頭整落手掌，事前試了多次都冇事，但真演出時就灼到手，但冇大礙，Jay Jay聽到後即時關心爸爸。提到9歲的「香港小巨肺」Celine（譚芷昀），陳琪自爆Celine爸爸譚順生的音樂學院有叫過大女去學唱歌，但女兒本身已在學校參與合唱團。陳琪更笑指女兒沒有唱歌天分，Jay Jay即說：「唔好講秘密出嚟啦！」十分搞笑。
可嵐斷十字韌帶
同場的可嵐因為左腳十字韌帶斷了，故需用拐杖輔助，她說：「四月尾練武術動作，跳彈床時隻腳直落地，醫生話半月板碎得好厲害。我五月底做手術，要休息一個月，唔用得力。」
另外，問到胡楓何時去謝賢的豪宅開派對？他笑言：「我好耐冇開Party，佢有豪宅住我都戥佢開心。」而冼國林笑言與徒弟阮頌揚及葉芷如切磋功夫不能用真力，惟有被二人打。
文：名人組